ايتي مەن ناگويادا (جاپونيا) ءوتىپ جاتقان جازعى ازيا ويىندارىندا قازاقستاندىق دزيۋدوشى اجار اسحات كۇمىس مەدال جەڭىپ الدى، دەپ حابارلايدى infohub.kz سايتى.
ۇلتتىق قۇراما ساپىنداعى سپورتشى 70 كەلىگە دەيىنگى سالماق دارەجەسىندە ونەر كورسەتىپ، فينالعا شىقتى. التىن مەدال ءۇشىن شەشۋشى بەلدەسۋدە قازاقستاندىق تاتامي قوجايىنى — جاپونيالىق رين ماەدامەن كەزدەستى.
فينالدىق بەلدەسۋ Aichi International Arena تاتاميىندە ءوتتى. جاپونيالىق سپورتشى بەلدەسۋدى مەرزىمىنەن بۇرىن اياقتادى: ماەدا 1 مينۋت 18 سەكۋندتا يپپونمەن جەڭىسكە جەتتى. وعان دەيىن ول «يۋكو» باعاسىن دا العان بولاتىن.
وسىلايشا، اسحات ەكىنشى ورىندى يەلەنىپ، قازاقستان قۇراماسىنا ازيا ويىندارى-2026-نىڭ كۇمىس جۇلدەسىن سىيلادى.
ايتا كەتەيىك، ءدال وسى جارىس كۇنى ەرلەر اراسىنداعى دزيۋدو تۋرنيرىندە تاعى ءبىر قازاقستاندىق سپورتشى مەدال الدى. 81 كەلىگە دەيىنگى سالماق دارەجەسىندە ادىلەت المات تا فينالدا جاپونيالىق سوتارو فۋدزيۆاراعا جول بەرىپ، كۇمىس جۇلدەگەر اتاندى.