قازاقستان ءوز پوزيسياسىن Forbes-2026 جاھاندىق ميللياردەرلەر رەيتينگىندە نىعايتتى. پلانەتاداعى ەڭ باي ادامدار تىزىمىنە العاش رەت قازاقستاندىق ەكى كاسىپكەر – نۇرلان سماعۇلوۆ پەن ايدىن راحيمبايەۆ ەندى، دەپ حابارلايدى infohub.kz.
ەكى بيزنەسمەن دە $1 ملرد مەجەسىنەن استى. بۇل – Forbes جاھاندىق رەيتينگىنە ەنۋ ءۇشىن مىندەتتى شارت. بيىل تىزىمگە الەمنىڭ 3400-دەن استام ميللياردەرى قوسىلدى.
Astana Group حولدينگىنىڭ نەگىزىن قالاۋشى ءارى پرەزيدەنتى نۇرلان سماعۇلوۆ جاھاندىق رەيتينگكە العاش رەت ەندى. Forbes ونىڭ بايلىعىن $1،3 ملرد دەپ باعالاپ، 2858-ورىنعا قويدى. كاسىپكەر بيزنەسىن 1992 جىلى Astana Motors اۆتوسالونىن اشۋدان باستاعان. ءقازىر كومپانيا وننان استام اۆتوموبيل برەندىنىڭ رەسمي ديلەرى جانە ديستريبيۋتورى، سونىمەن قاتار جەڭىل جانە كوممەرسيالىق كولىكتەر وندىرەدى. اۆتوموبيل بيزنەسىنەن بولەك، سماعۇلوۆ كوممەرسيالىق جىلجىمايتىن م ۇلىككە بەلسەندى ينۆەستيسيا سالادى: 2006 جىلى قازاقستانداعى العاشقى زاماناۋي ساۋدا-ويىن ساۋىق ورتالىقتارىنىڭ ءبىرى – MEGA-نى اشقان. 2025 جىلى بيزنەسمەن تاعى ءبىر اۋقىمدى جوبانى جۇزەگە اسىرىپ، الماتى ونەر مۇراجايىن اشتى. بۇل – ەلدەگى زاماناۋي ونەردىڭ العاشقى جەكە مۇراجايى. ونى قۇرۋعا سالىنعان ينۆەستيسيا $120 ملن-نان استى.
رەيتينگتىڭ تاعى ءبىر جاڭا قاتىسۋشىسى – BI Group سەرىكتەسى ءارى نەگىزگى اكسيونەرى ايدىن راحيمبايەۆ. Forbes ونىڭ بايلىعىن $1،1 ملرد دەپ باعالاپ، 3185-ورىنعا قويدى. BI Group 1980-جىلداردىڭ اياعىندا قۇرىلىپ، ۋاقىت وتە قازاقستاننىڭ ەڭ ءىرى قۇرىلىس جانە دەۆەلوپەرلىك كومپانياسىنا اينالدى. بۇگىندە حولدينگ تەك ەل ىشىندە عانا ەمەس، وزبەكستان، اقش، بىرىككەن اراب امىرلىكتەرى جانە ءازىربايجاندا دا جوبالاردى جۇزەگە اسىرادى. بيزنەستەن بولەك، راحيمبايەۆ IQanat ءبىلىم بەرۋ جوباسىنىڭ نەگىزىن قالاۋشىلاردىڭ ءبىرى. بۇل جوبانىڭ قىزمەتى گارۆارد بيزنەس مەكتەبىنىڭ زەرتتەۋ نىسانىنا اينالعان.
جاڭا ميللياردەرلەردىڭ پايدا بولۋىنا قاراماستان، Kaspi.kz ديرەكتورلار كەڭەسىنىڭ ءتوراعاسى ۆياچەسلاۆ كيم ەلىمىزدىڭ ەڭ باي بيزنەسمەنى بولىپ قالادى. Forbes دەرەگىنشە، ونىڭ بايلىعى $7،8 ملرد-قا جەتىپ، الەمدىك رەيتينگتە 477-ورىن العان. سالىستىرۋ ءۇشىن، ءبىر جىل بۇرىن ونىڭ كاپيتالى شامامەن $7،1 ملرد بولعان. قازاقستاندىق كاسىپكەرلەر اراسىندا ەكىنشى ورىندا – ۆلاديمير كيم. ونىڭ بايلىعى $5،9 ملرد-قا ارتىپ، 712-ورىنعا كوتەرىلگەن. كەيىنگى ورىنداردا تيمۋر ق ۇلىبايەۆ پەن دينارا ق ۇلىباەۆا. ولاردىڭ ءارقايسىسىنىڭ بايلىعى $5،4 ملرد شاماسىندا جانە رەيتينگتە 780-ورىندا تۇر. بولات وتەمۇراتوۆ وتكەن جىلداعى $3،7 ملرد-تان $5،4 ملرد-قا دەيىن اكتيۆتەرىن ۇلعايتقان. Freedom Holding نەگىزىن قالاۋشى تيمۋر تۇرلوۆتىڭ كاپيتالىندا ازداعان تومەندەۋ بايقالدى: $5،8 ملرد-تان $5،2 ملرد-قا – ول 823-ورىندى يەلەندى. تىزىمگە سونداي-اق ۆياچەسلاۆ كيمنىڭ ىسكەر سەرىكتەسى ميحايل لومتادزە $6 ملرد بايلىعىمەن ەنگەن، الايدا Forbes ونى گرۋزيا كاسىپكەرى رەتىندە قاراستىرادى.
الەمدىك Forbes رەيتينگىنىڭ كوشباسشىسى قايتادان يلون ماسك بولدى. باسىلىمنىڭ باعالاۋىنشا، ونىڭ بايلىعى ەكى ەسەدەن استام ءوسىپ، $839 ملرد-قا جەتكەن. پلانەتاداعى ەڭ باي بەس ادامنىڭ قاتارىنا سونداي-اق لارري پەيدج ($257 ملرد)، سەرگەي برين ($237 ملرد)، دجەفف بەزوس ($224 ملرد) جانە مارك سۋكەربەرگ ($222 ملرد) ەنگەن.