جاپونيادا ءوتىپ جاتقان ازيا ويىندارىنىڭ ەكىنشى تۋرىندا قازاقستاننىڭ ەرلەر سۋ دوبى كومانداسى گونكونگ قۇراماسىن 29:15 (8:3، 9:4، 6:1، 6:7) ەسەبىمەن ويسىراتا جەڭدى، دەپ حابارلايدى infohub.kz سايتى.
ءبىر كۇن بۇرىن ۆاتەرپولو ءتۋرنيرىنىڭ ستارتتىق ماچىندا قازاقستاندىقتار جارىس يەلەرىنە جول بەرگەن بولاتىن. ويىنداردىڭ بەس دۇركىن چەمپيوندارى التى دۇركىن جەڭىمپازدارعا 19:11 ەسەبىمەن ۇتىلدى.
بۇگىن چەرنوگوريالىق مامان نەمانيا كنەجەۆيچ شاكىرتتەرى الدەقايدا ءساتتى ونەر كورسەتتى. ءبىرىنشى كەزەڭنەن كەيىن-اق قازاقستاندىقتار 8:3 ەسەبىمەن الدا بولدى. سوڭعى شيرەككە دەيىن قازاقستان قۇراماسى ايىرماشىلىقتى 15 گولعا جەتكىزدى. ناتيجەسىندە جەڭىس ەسەپتە ەكى ەسەگە جۋىق باسىمدىقپەن — 29:15 بولدى.
ءتۋرنيردىڭ شيرەك فينالىنا بارلىق سەگىز قاتىسۋشى كوماندا شىعادى. توپتىق ماچتار پلەي-وفف ءۇشىن كوماندالاردى «سەبۋ» ءۇشىن عانا قاجەت.
ازيا ويىندارى-2026. سۋ دوبى. ەرلەر. ا توبى: تايلاند — گونكونگ 15:24، جاپونيا — قازاقستان 19:11، قازاقستان — گونكونگ 29:15. ۆ توبى: وڭتۇستىك كورەيا — جۇڭگو 15:14، يران — سينگاپۋر 19:8.
ازيادانىڭ ەرلەر اراسىنداعى سۋ دوبى ءتۋرنيرى 1951 جىلدان بەرى وتكىزىلىپ كەلەدى. قازاقستاندىق ۆاتەرپولشىلار ونى التى رەت جەڭىپ العان (1994، 1998، 2002، 2010، 2014، 2018). تاعى ەكى رەت (2006، 2022) قولا جۇلدەگەر اتاندى.
XX جازعى ازيا ويىندارى رەسمي تۇردە 19 قىركۇيەكتە اشىلدى جانە 4 قازاندا اياقتالادى. 45 ەلدىڭ سپورتشىلارى قاتىساتىن جارىستاردا 460 مەدال جيىنتىعى ساراپقا سالىنۋدا. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى ونەر كورسەتۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتيستەر جولامان بيگابىل مەن سوفيا بەرۋلسەۆا. قۇرامانىڭ قورجىنىنا بەسىنشى التىندى مما سايىسكەرى ەركىنعالي بۇركىتالين قوستى. التىنشىسىن — ونىڭ ارالاس جەكپە-جەك كومانداسىنداعى جولداسى قادىربەك شىنبايەۆ. 23 قىركۇيەكتە لۋسەنكو اي-2026-نىڭ ەكى دۇركىن چەمپيونى اتاندى. سەگىزىنشى جوعارى دارەجەلى مەدالدى 24 قىركۇيەكتە ەسكەكشىلەر ۆلاديسلاۆ ياكوۆليەۆ پەن يۆان چەرنۋحين ەرلەر اراسىنداعى جۇپ ەسكەكتى قايىقتار سايىسىندا جەڭىپ الدى. ياسمينا توقسانباەۆا بۇگىن مارافوندىق ءجۇرىس سايىسىندا توعىزىنشى التىندى جەڭىپ الدى.
ويىنداردىڭ جەتى كۇنىنەن كەيىن قازاقستان بەيرەسمي مەدال ەسەبىندە بەسىنشى ورىندا تۇردى.