2026 جىلدىڭ شىلدەسىنەن باستاپ قازاقستان ازاماتتارى يندونەزياعا ۆيزاسىز كىرىپ، وندا 30 كۇنگە دەيىن بولا الادى. ساپار ءۇشىن ۇلتتىق پاسپورت پەن ەلەكتروندىق دەكلاراسيا جەتكىلىكتى، دەپ حابارلايدى infohub.kz سايتى.
ءتيىستى شەشىمدى يندونەزيانىڭ سىرتقى ىستەر مينيسترلىگى قابىلدادى. ۆيزاسىز رەجيم ءوزارا نەگىزدە ارەكەت ەتەدى: بۇعان دەيىن قازاقستان يندونەزيا ازاماتتارىنا ەلىمىزگە ۆيزاسىز كىرىپ، اۋماعىندا 30 كۇنگە دەيىن بولۋ مۇمكىندىگىن بەرگەن.
«ۆيزاسىز كىرۋ تۋرالى شەشىم قابىلداعان كەزدە يندونەزيالىق تاراپ ءوزارالىق قاعيداتىن دا ەسكەردى. قازاقستان بۇعان دەيىن يندونەزيا ازاماتتارىنا ەلىمىزگە ۆيزاسىز كىرىپ، 30 كۇنگە دەيىن بولۋ قۇقىعىن بەرگەن. وسىلايشا، ەكى ەلدىڭ ۇلتتىق پاسپورت يەلەرى ءۇشىن 30 كۇنگە دەيىنگى مەرزىمگە ۆيزاسىز رەجيمدەر قولدانىلادى. يندونەزيالىق تاراپ بەلگىلەگەن شارتتار بويىنشا ۆيزاسىز رەجيم تەگىن جانە ءبىر رەتتىك كىرۋدى كوزدەيدى. ەڭ ۇزاق بولۋ مەرزىمى كەلگەن كۇننەن باستاپ 30 كۇندى قۇرايدى»، — دەلىنگەن حابارلامادا.
سونىمەن قاتار ازاماتتار يندونەزياعا كىرۋ كەزىندە قولدانىلاتىن جالپى تالاپتاردى ەسكەرۋى كەرەك. «2025 جىلدىڭ 1 قازانىنان باستاپ شەتەلدەن كەلگەن بارلىق جولاۋشى «All Indonesia» ءبىرىڭعاي ەلەكتروندىق دەكلاراسياسىن تولتىرۋعا مىندەتتى. دەكلاراسيا تەگىن تولتىرىلادى جانە ونى الدىن الا راسىمدەۋگە بولادى»، — دەپ قوستى ۆەدومستۆو.
بۇعان دەيىن يندونەزيا پارلامەنتى شەتەلدىكتەرگە باقىلاۋدى كۇشەيتۋگە شاقىرعانى حابارلانعان.