قازاقستان كولىك مينيسترلىگى جولاۋشىلاردى، باگاجدى جانە جۇكتى اۋە كولىگىمەن تاسىمالداۋ ەرەجەلەرىنە تۇزەتۋلەر ەنگىزۋدى ۇسىندى، دەپ حابارلايدى infohub.kz.
تۇزەتۋلەردىڭ ءبىرى مۋزىكالىق اسپاپتارعا قاتىستى. ولاردى ۇشاق سالونىندا قول جۇگى رەتىندە، بولەك جولاۋشى ورنىندا نەمەسە تىركەلگەن باگاجبەن تاسىمالداۋ جوسپارلانۋدا. دومبىرا، قوبىز جانە باسقا اسپاپتاردى قورعانىش قاپتامادا سالونعا الۋعا رۇقسات ەتىلەدى. الايدا شەكتەۋلەر بار: ولشەمى — 110×35×30 سم-دەن، سالماعى — 10 كگ-نان اسپاۋى كەرەك.
جوبا سونداي-اق جانۋارلاردى ۇشاق سالونىندا تاسىمالداۋ مۇمكىندىگىن قاراستىرادى — اۆياكومپانيا بەلگىلەگەن شارتتار بويىنشا. تاعى ءبىر تۇزەتۋ مۇگەدەكتىگى بار جولاۋشىلارعا ارنالعان. كولىك مينيسترلىگى وسى ساناتتاعى ازاماتتارعا اۋە تاسىمالى بويىنشا جەڭىلدىكتەردى زاڭنامالىق دەڭگەيدە بەكىتۋدى ۇسىنادى.
بۇدان باسقا، بيلىك اۆياكومپانيا ۇشاقتى سىيىمدىلىعى از مودەلگە اۋىستىرعان جاعدايدا ەرەجە ەنگىزگىسى كەلەدى. ونداي جاعدايدا وتىرعىزۋ كەزىندە كامەلەتكە تولماعاندار، مۇگەدەكتىگى بار ادامدار، اۋىر ناۋقاستار، جۇكتى ايەلدەر مەن زەينەتكەرلەرگە باسىمدىق بەرىلۋى ءتيىس.
جولاۋشىلار قۇقىعىن قورعاۋ ءۇشىن جولاۋشىنى جەتكىزۋدى كەشىكتىرگەنى ءۇشىن ايىپپۇل تولەۋدىڭ ناقتى مەرزىمىن بەلگىلەۋ ۇسىنىلادى — ءوتىنىش بەرىلگەن كۇننەن باستاپ 10 كۇنتىزبەلىك كۇننەن اسپاۋى كەرەك. اۆياكومپانيالار تىركەلمەگەن باگاجدىڭ ب ۇلىنۋىنە جاۋاپ بەرۋگە مىندەتتى بولۋى مۇمكىن، ەگەر تاسىمالداۋشىنىڭ كىناسى دالەلدەنسە.