قازاقستاندا سوڭعى ءۇش جىلدا ونكولوگيالىق اۋرۋلاردان بولاتىن ءولىم-جىتىم 26،6%-عا تومەندەپ، پاسيەنتتەردىڭ بەس جىلدىق ءومىر ءسۇرۋ كورسەتكىشى 65%-عا جەتتى، دەپ حابارلايدى infohub.kz.
رەسپۋبليكانىڭ دەنساۋلىق ساقتاۋ مينيسترلىگى قاتەرلى ىسىكپەن كۇرەستە بىرنەشە نەگىزگى كورسەتكىشتىڭ جاقسارعانىن اتاپ ءوتتى. ءولىم-جىتىمنىڭ ازايۋى مەن ءومىر ءسۇرۋ ۇزاقتىعىنىڭ ارتۋىمەن قاتار، ەرتە دياگنوستيكادا دا وڭ ديناميكا بايقالادى: ەرتە كەزەڭدە انىقتالعان جاعدايلاردىڭ ۇلەسى 36،8%-عا دەيىن ءوستى، ال اۋرۋدىڭ اسقىنعان تۇرلەرىنىڭ سانى 7،5%-عا ازايدى.
«سوڭعى ءۇش جىلدا ەرتە كەزەڭدە انىقتالعان قاتەرلى ىسىك جاعدايلارىنىڭ ۇلەسى 6،1%-عا – 36،8%-عا دەيىن ءوستى، ال ونكولوگيانىڭ اسقىنعان جاعدايلارىنىڭ سانىن 7،5%-عا تومەندەتۋگە قول جەتكىزىلدى»، – دەلىنگەن ۆەدومستۆو حابارلاماسىندا.
قازىرگى ۋاقىتتا ديناميكالىق باقىلاۋدا 246 مىڭ پاسيەنت تۇر. ەلىمىزدە جىل سايىن ونكولوگيالىق اۋرۋلاردىڭ 43 مىڭعا جۋىق جاڭا جاعدايى انىقتالادى.
مينيسترلىكتە قول جەتكىزىلگەن ناتيجەلەر قازاقستانعا ورتالىق ازيا ەلدەرى اراسىنداعى پوزيسياسىن نىعايتۋعا جانە قاتەرلى ىسىكپەن كۇرەستىڭ نەگىزى ەرتە دياگنوستيكا مەن زاماناۋي ەمدەۋ ادىستەرى بولىپ تابىلاتىن ەىدۇ ەلدەرىنىڭ دەڭگەيىنە بىرتىندەپ جاقىنداۋعا مۇمكىندىك بەرەتىنىن ايتادى.
«ءبىز ءاربىر پاسيەنت تۇرعىلىقتى جەرىنە قاراماستان ساپالى ونكولوگيالىق كومەك الا الاتىن جۇيەنى دايەكتى تۇردە قۇرىپ جاتىرمىز. بۇل ءبىرجولعى شەشىمدەر ەمەس، ناقتى ناتيجە بەرىپ جاتقان ۇزاق مەرزىمدى وزگەرىستەر»، – دەپ اتاپ ءوتتى دەنساۋلىق ساقتاۋ ءمينيسترى.
دەنساۋلىق ساقتاۋ مينيسترلىگىندە ونكولوگيالىق قىزمەتتى جاڭعىرتۋ مەملەكەت باسشىسىنىڭ تاپسىرمالارىن ورىنداۋ ماقساتىندا جۇزەگە اسىرىلىپ جاتقان ونكولوگيالىق اۋرۋلارمەن كۇرەس جونىندەگى كەشەندى جوسپار اياسىندا جۇرگىزىلىپ جاتقانىن قوسىمشا ايتتى.