قازاقستان پرەزيدەنتىنە دەگەن سەنىم دەڭگەيى 86،9%-عا جەتتى، دەپ حابارلايدى infohub.kz سايتى.
الەۋمەتتانۋشىلاردىڭ دەرەگىنشە، ساۋالناماعا قاتىسقانداردىڭ 84،1%-ى قازاقستانداعى قوعامدىق-ساياسي جاعدايدى تۇراقتى نەمەسە قولايلى دەپ باعالاعان. ءبىرىنشى توقساندا بۇل كورسەتكىش 70،4% بولعان ەكەن.
زەرتتەۋ ناتيجەسىندە رەسپوندەنتتەردىڭ 85،8%-ى ءوز ومىرىنە قاناعاتتانعانىن، ال 50،5%-ىنىڭ سوڭعى ءبىر جىلدا ماتەريالدىق جاعدايى جاقسارعانىن كورسەتتى. 18-28 جاس ارالىعىنداعى جاستاردىڭ 87،1%-ى ەلدەگى احۋالدى تۇراقتى دەپ ساناسا، 65،6%-ى الداعى ءبىر جىلدا ءومىرىنىڭ جاقساراتىنىنا ۇمىتتەنەدى.
قيوز-دىڭ جەكە زەرتتەۋى ساياسي باسىمدىقتارعا ارنالعان. رەسپوندەنتتەردىڭ 75،1%-ى قۇرىلتاي سايلاۋىنا قاتىسۋعا دايىن ەكەنىن بىلدىرگەن. ونىڭ ىشىندە 37،6%-ى سايلاۋ ۋچاسكەسىنە ءسوزسىز باراتىنىن، تاعى 37،5%-ى داۋىس بەرۋگە بەيىم ەكەنىن ايتقان.
قيوز ماماندارى ءبىرىنشى توقساندا 2400 ادام، ەكىنشى توقساندا 1200 ادام سۇرالعانىن اتاپ ءوتتى. ۇيىمداستىرۋشىلاردىڭ ايتۋىنشا، ناتيجەلەر قۇرىلتاي سايلاۋى قارساڭىندا مەملەكەتتىك ينستيتۋتتارعا دەگەن سەنىمنىڭ جوعارى ەكەنىن كورسەتەدى.
بۇدان بۇرىن ورتالىق سايلاۋ كوميسسياسىنىڭ ءتوراعاسى شاۆكات وتەمىسوۆ 23 تامىزعا جوسپارلانعان پارلامەنتتىك سايلاۋعا قاتىساتىن ساياسي پارتيالار ءۇشىن سايلاۋ جارناسىنىڭ مولشەرىن ايتقان بولاتىن.