قازاقستاندا كەڭسە مەن ساۋدا ءۇي-جايلارىن جالعا الۋ باعاسى سوڭعى بەس جىلدا شامامەن 20%-عا ءوستى. 2020 جىلدىڭ سوڭىمەن سالىستىرعاندا ءوسىم 19،3%-دى قۇراسا، ءبىر جىل ىشىندە باعا 4،1%-عا قىمباتتاعان. بۇل تۋرالى infohub.kz سايتى حابارلايدى.
ەڭ ايقىن ءوسىم استانادا تىركەلگەن، ال كەيبىر وڭىرلەردە جالداۋ باعاسى ءىس جۇزىندە وزگەرمەگەن نەمەسە ءتىپتى ازداپ تومەندەگەن. بۇل تۋرالى ۇلتتىق ستاتيستيكا بيۋروسىنىڭ 2026 جىلعى ءىى توقسان قورىتىندىسى بويىنشا دەرەكتەرى دالەلدەيدى.
اعىمداعى جىلدىڭ ءبىرىنشى توقسانىمەن سالىستىرعاندا قازاقستان بويىنشا كوممەرسيالىق جىلجىمايتىن م ۇلىكتى جالداۋ باعاسىنىڭ يندەكسى 100،1%-دى قۇرادى، بۇل ءۇش اي ىشىندە باعا دەڭگەيىنىڭ ءىس جۇزىندە وزگەرمەگەنىن كورسەتەدى. الايدا وڭىرلەر بولىنىسىندە جاعداي بىركەلكى بولمادى. ەڭ جوعارى توقساندىق ءوسىم الماتى وبلىسىندا (+0،6%) تىركەلدى، ودان كەيىن اقمولا وبلىسى (+0،5%) جانە استانا (+0،4%) كەلەدى. ال جەتىسۋ (–0،5%)، قاراعاندى (–0،7%) جانە اتىراۋ وبلىستارىندا (–0،3%) باعانىڭ شامالى تومەندەۋى بايقالدى.
وتكەن جىلدىڭ ەكىنشى توقسانىمەن سالىستىرعاندا كوممەرسيالىق جىلجىمايتىن م ۇلىكتى جالداۋ باعاسى ەل بويىنشا ورتا ەسەپپەن 4،1%-عا قىمباتتادى. ەڭ جوعارى ءوسىمدى استانا كورسەتتى (+6،7%). ايتارلىقتاي ءوسىم بايقالعان وڭىرلەر قاتارىنا باتىس قازاقستان (+5،3%)، پاۆلودار (+4،2%)، قوستاناي (+3،8%)، اقمولا (+3،7%)، قاراعاندى (+3،7%)، ماڭعىستاۋ (+3،4%) جانە شىعىس قازاقستان (+3،2%) وبلىستارى كىردى. ەڭ از جىلدىق وزگەرىس اتىراۋ وبلىسىندا تىركەلدى (+0،2%). سونداي-اق قىزىلوردا (+0،5%) مەن الماتى وبلىسىندا (+1،2%) شامالى ءوسىم بايقالدى.
سوڭعى جىلدارداعى ديناميكا ودان دا ايقىن. 2020 جىلدىڭ ءتورتىنشى توقسانىمەن سالىستىرعاندا قازاقستان بويىنشا كوممەرسيالىق جىلجىمايتىن م ۇلىكتى جالداۋ باعاسى 19،3%-عا ءوستى. ەڭ ەلەۋلى باعا ءوسىمى اقمولا (+32،4%)، اقتوبە (+23،8%)، قاراعاندى (+22،7%) وبلىستارىندا، سونداي-اق استانادا (+21،5%) جانە ماڭعىستاۋ وبلىسىندا (+20%) بولدى. ال وسى كەزەڭدە ەڭ از ءوسىم اتىراۋ وبلىسىندا (+2،3%)، ۇلىتاۋدا (+3،1%)، قىزىلوردا (+3،2%) جانە تۇركىستان وبلىسىندا (+3،4%) بايقالدى.
2026 جىلدىڭ ەكىنشى توقسانىندا سالىستىرمالى تۇردە تۇراقتى ديناميكا بايقالعانىمەن، ۇزاق مەرزىمدى پەرسپەكتيۆادا قازاقستاندا كوممەرسيالىق جىلجىمايتىن م ۇلىكتى جالداۋ قۇنى ارتا بەرۋدە.
بۇعان دەيىن AERC شولۋىندا قازاقستانداعى دەۆەلوپەرلەر دايىن نىسانداردىڭ باعاسىن تومەندەتۋگە ءماجبۇر ەكەنى ايتىلعان بولاتىن: «ەكونوم» سىنىبىنداعى پاتەرلەر تەك مامىر ايىندا قۇنىنىڭ 10%-دان استامىن جوعالتقان. ۇلتتىق ستاتيستيكا بيۋروسىنىڭ دەرەگىنشە، مامىردا قازاقستانداعى تۇرعىن ءۇي نارىعى ايتارلىقتاي سۋىعان: مامىلەلەر سانى ساۋىرمەن سالىستىرعاندا 13،5%-عا، جىلدىق كورسەتكىشتە 10،5%-عا قىسقارعان. سۇرانىستىڭ ەڭ قاتتى تومەندەۋى الماتىدا تىركەلگەن. ساراپشىلار مامىرداعى قۇلدىراۋ ماۋسىمدىق ەكەنىن، الايدا 2026 جىلى ونىڭ تەرەڭىرەك بولعانىن اتاپ وتەدى. بەلسەندىلىكتىڭ تومەندەۋى اياسىندا مامىردا ەكىنشى نارىقتاعى باعا الماتىدا دا، استانادا دا ازداپ تومەندەگەن. ال ەكى ءىرى قالاداعى جاڭا قۇرىلىس باعاسى تۇراقتالىپ، ايتارلىقتاي وزگەرمەگەن. سونىمەن قاتار، ماۋسىم ايىنداعى سوڭعى ستاتيستيكا قازاقستاندا تۇرعىن ءۇي باعاسىنىڭ ءوسۋىن جالعاستىرعانىن كورسەتەدى.