ۆەنگريا استاناسى بۋداپەشتە كۇرەس تۇرلەرىنەن حالىقارالىق رەيتينگتىك تۋرنير باستالدى. وعان قازاقستان قۇراماسى قاتىسۋدا. ءبىرىنشى جارىس كۇنى ەركىن كۇرەستىڭ التى سالماق دارەجەسىندە مەدالدار ويناتىلدى. قورىتىندىسىندا قازاقستاندىق بالۋاندار التى جۇلدەگە يە بولدى، دەپ حابارلايدى infohub.kz سايتى.
التىن مەدالدى اسىل ايتاقىن جەڭىپ الدى. 61 كەلىگە دەيىنگى سالماق دارەجەسىندەگى فينالدا ول تۇرىك سپورتشىسى تولعا وزبەكتى جەڭدى. وسى سالماقتا تاعى ءبىر قازاقستاندىق ادىلەت المۇحامەدوۆ قولا مەدالعا يە بولدى.
74 كەلىگە دەيىنگى سالماقتا نۇرقوجا قايپانوۆ فينالعا دەيىن جەتتى. شەشۋشى بەلدەسۋدە ول قىتايلىق فەن لۋعا جول بەرىپ، كۇمىس جۇلدەگەر اتاندى.
57 كەلىگە دەيىنگى سالماقتا نۇردانات ايتانوۆ پەن مەيرامبەك قارتباي، 65 كەلىگە دەيىنگى سالماقتا ناچىن كۋۋلار قولا مەدال يەگەرلەرى اتاندى.
بۇگىن، 16 شىلدەدە، كىلەمگە 79، 92، 97 جانە 125 كەلىگە دەيىنگى سالماق دارەجەسىندەگى ەركىن كۇرەسشىلەر شىعادى. سونىمەن قاتار، ايەلدەر كۇرەسىنىڭ وكىلدەرى دە ءتۋرنيردى باستايدى.
ءبىزدىڭ Telegram-ارنامىز @sportnurkz-عا جازىلىڭىز. مۇندا ءسىز سپورتتىڭ ەڭ جاڭا جاڭالىقتارىن تابا الاسىز.