قازاقستاننىڭ ەرلەر فۋتبول قۇراماسى ۋەفا ۇلتتار ليگاسىنىڭ 2026/27 ماۋسىمىنداعى ءۇشىنشى تۋردا ءوز الاڭىندا مولدوۆادان ۇتىلدى. كەزدەسۋ «استانا ارەنادا» ءوتىپ، قازاقستاندىقتار ءۇشىن اتالعان تۋرنيردەگى العاشقى ءۇي ماچى بولدى، دەپ حابارلايدى infohub.kz سايتى.
قارسىلاستار كۇشى جاعىنان ءۇشىنشى ديۆيزيوننىڭ س3 توبىندا وينايدى. قوناقتار جارتىلاي قورعاۋشى نيكي كلەششەنكونىڭ (45+1-مينۋت) جانە شابۋىلشى پەترۋ پوپەسكۋدىڭ (50) گولدارىنىڭ ارقاسىندا 2:1 ەسەبىمەن جەڭىسكە جەتتى.
الاڭ يەلەرىنىڭ جالعىز گولىن قورعاۋشى نۇرالى ءالىپ (64) سوقتى. ول قازاقستان قۇراماسى ساپىنداعى العاشقى گولىن ەنشىلەپ، ناتيجەلى پاس اۆتورى جارتىلاي قورعاۋشى ءارى كاپيتان باۋىرجان يسلامحان بولدى.
74-مينۋتتا الاڭعا قورعاۋشى سەرگەي مالىي شىقتى. ول قازاقستان قۇراماسى ساپىنداعى ويىن سانى بويىنشا سامات سماقوۆتىڭ رەكوردىن قايتالادى — 76.
ۇلتتىق كوماندا قاتارىنان ەكىنشى رەت جەڭىلىس تاپتى. نيدەرلاندتىق باپكەر دجون ۆان 'ت ءسحيپتىڭ جەتەكشىلىگىمەن ول ازىرگە جەڭىسكە جەتكەن جوق.
ءبىر ۇپايمەن قازاقستان قۇراماسى توپتاعى سوڭعى ءتورتىنشى ورىنعا ءتۇستى. مولدوۆالىقتار ءتورت ۇپاي جيناپ، ەكىنشى ساتىعا كوتەرىلدى.
كەستەدە التى ۇپايى بار سلوۆاكتار كوش باستاپ تۇر. ەكى ۇپايى بار فارەر ارالدارى قۇراماسى ءۇشىنشى ورىندا. بۇل ەكى كوماندا كەيىنىرەك ءۇشىنشى تۋردىڭ ءوزارا ماچىن وتكىزەدى.
قازاقستان قۇراماسى حالىقارالىق تەرەزەنى فارەر ارالدارىمەن ۇيدەگى كەزدەسۋمەن جابادى. ول 6 قازاندا «استانا ارەنادا» ءوتىپ، 19:00-دە باستالادى.