قازاقستان جۇڭگو حالىق رەسپۋبليكاسىنىڭ شانحاي ىنتىماقتاستىق ۇيىمىنىڭ (شىۇ) دامۋ بانكىن قۇرۋ باستاماسىن رەسمي تۇردە قولدادى. بۇل تۋرالى پرەزيدەنت قاسىم-جومارت توقايەۆ بىشكەكتە وتكەن شىۇ-عا مۇشە مەملەكەتتەر باسشىلارى كەڭەسىنىڭ وتىرىسىندا مالىمدەدى، دەپ حابارلايدى infohub.kz.
مەملەكەت باسشىسى ارىپتەستەرى الدىندا سويلەپ، ۇيىم اياسىندا تولىققاندى ينۆەستيسيالىق كونتۋر قالىپتاستىرۋ قاجەتتىگىن اتاپ ءوتتى. «شانحاي وندىعى» ەلدەرىنىڭ ءوزارا تاۋار اينالىمى 1 تريلليون دوللارعا جاقىنداعانىنا قاراماستان، ەكونوميكالىق ءوزارا بايلانىس الەۋەتى تولىق اشىلماعان.
مامانداندىرىلعان قارجى ينستيتۋتىنىڭ ىسكە قوسىلۋى مۇشە ەلدەردىڭ ۋاعدالاستىقتارىن ناقتى ونەركاسىپتىك جانە ينفراقۇرىلىمدىق جوبالارعا اينالدىرۋعا مۇمكىندىك بەرەدى.
«قازاقستان قىتايدىڭ شىۇ دامۋ بانكىن قۇرۋ باستاماسىن قولدايدى. بۇل بانكتىڭ رەسۋرستارىن ەڭ الدىمەن ينفراقۇرىلىمدىق، تەحنولوگيالىق جانە ونەركاسىپتىك جوبالارعا باعىتتاعان ءجون دەپ سانايمىز. ال مۇشە مەملەكەتتەردىڭ ورتاق كەلىسىمى بولعان جاعدايدا، قازاقستان بۇل ينستيتۋتتى، ونىڭ شتاب-پاتەرىن ءوز ەلىندە قابىلداي الار ەدى»، — دەدى ول.
دامۋ بانكىن ىسكە قوسۋدان بولەك، قازاقستان پرەزيدەنتى پيلوتتىق يندۋستريالىق كونسورسيۋمدار تەتىگىن ەنگىزۋدى ۇسىندى. بۇل فورمات ەلدەرگە ۇيىمنىڭ بارلىق مۇشەلەرى قوسىلعانشا كۇتپەي-اق، دايىندىعىنا قاراي بىرلەسكەن ەكونوميكالىق جوبالاردى باستاۋعا، ال تابىستى باستامالاردى كەيىن كەڭەيتۋگە مۇمكىندىك بەرەدى.
سونداي-اق، بولاشاق بانك جۇمىسىن جانداندىرۋداعى ماڭىزدى قادام — قولدانىستاعى شەكارا ماڭى ىنتىماقتاستىق ورتالىقتارىنىڭ بازاسىندا ترانسشەكارالىق ساۋدا ايماقتارىن قۇرۋ. بۇل جەڭىلدەتىلگەن تاۋار الماسۋدى، سيفرلىق راسىمدەردى جانە ءوزارا ەسەپ ايىرىسۋدىڭ زاماناۋي تەتىكتەرىن سىناقتان وتكىزۋگە مۇمكىندىك بەرەدى.