قازاقستاندا جاساندى ينتەللەكتتىڭ دامۋىنا بايلانىستى مەكتەپ پاندەرىنىڭ مازمۇنى جاڭارتىلۋدا. infohub.kz سايتىنىڭ حابارلاۋىنشا، ءتيىستى وزگەرىستەردى وقۋ-اعارتۋ مينيسترلىگى جاريالادى.
ۆەدومستۆو تەحنولوگيالاردىڭ قارقىندى دامۋى، ەڭبەك نارىعى تالاپتارىنىڭ وزگەرۋى جانە جاساندى ينتەللەكتتىڭ ءومىردىڭ بارلىق سالاسىنا كەڭىنەن ەنۋى ءبىلىم بەرۋ مازمۇنىن جاڭارتۋدى قاجەت ەتەتىنىن اتاپ ءوتتى.
«بۇل باعىتتاعى جۇيەلى جۇمىس مەملەكەت باسشىسى قاسىم-جومارت توقاەۆتىڭ 2025 جىلى وتكەن رەسپۋبليكالىق تامىز كونفەرەنسياسىندا بەرگەن تاپسىرماسىن ورىنداۋ ءۇشىن باستالدى. سول جىلدىڭ قىركۇيەگىنەن باستاپ جۇمىس كەزەڭ-كەزەڭىمەن جۇرگىزىلۋدە. كەيىننەن بۇل جۇمىستىڭ قۇقىقتىق نەگىزى نىعايتىلدى. 2025 جىلدىڭ قاراشاسىندا قازاقستان رەسپۋبليكاسىنىڭ «جاساندى ينتەللەكت تۋرالى» زاڭى قابىلداندى، ال 2026 جىلدىڭ مامىرىندا جاساندى ينتەللەكتتى ورتا ءبىلىم جۇيەسىنە ەنگىزۋ جونىندەگى پرەزيدەنت جارلىعى شىقتى»، — دەپ حابارلادى مينيسترلىكتە.
وسى قۇجاتتاردى ىسكە اسىرۋ اياسىندا مەملەكەتتىك جالپىعا مىندەتتى ءبىلىم بەرۋ ستاندارتى، ۇلگىلىك وقۋ جوسپارلارى مەن ۇلگىلىك وقۋ باعدارلامالارى جاڭارتىلدى. 1-4 سىنىپتارداعى «سيفرلىق ساۋاتتىلىق» ءپانى «سيفرلىق ساۋاتتىلىق جانە جاساندى ينتەللەكت» دەپ، ال 5-11 سىنىپتارداعى «ينفورماتيكا» ءپانى «ينفورماتيكا جانە جاساندى ينتەللەكت» دەپ قايتا اتالدى.
«بۇل تەك ءپان اتاۋلارىن وزگەرتۋ عانا ەمەس. جاساندى ينتەللەكت سيفرلىق تەحنولوگيالار مەن ينفورماتيكانىڭ اجىراماس بولىگىنە اينالدى. وسىعان بايلانىستى پاندەردىڭ مازمۇنىنا جاساندى ينتەللەكت بويىنشا جاڭا بولىمدەر مەن 43 وقۋ ماقساتى ەنگىزىلدى»، — دەپ اتاپ ءوتتى ۆەدومستۆودا.
بۇگىنگى تاڭدا وقۋشىلار كۇندەلىكتى ومىردە جاساندى ينتەللەكت قۇرالدارىن قولدانىپ جۇرگەنى ايتىلۋدا. ەندىگى مىندەت — ولاردى بۇل تەحنولوگيانى جاي عانا پايدالانۋعا ەمەس، ونى سانالى، ءتيىمدى ءارى جاۋاپكەرشىلىكپەن قولدانۋعا ۇيرەتۋ.
مينيسترلىك وقۋشىلاردى جاساندى ينتەللەكتپەن قالاي تانىستىراتىنىن ايتتى. 1-4 سىنىپتاردا «مەدياساۋاتتىلىق جانە جي» ءبولىمى اياسىندا 17 وقۋ ماقساتى قاراستىرىلعان. وقۋشىلار كۇندەلىكتى ومىردەگى قاراپايىم مىسالدار ارقىلى جاساندى ينتەللەكتپەن تانىسادى، سيفرلىق قاۋىپسىزدىك نەگىزدەرىن، جەكە دەرەكتەردى قورعاۋدى جانە سيفرلىق ورتاداعى جاۋاپتى مىنەز-ق ۇلىقتى مەڭگەرەدى.
5-9 سىنىپتاردا «كومپيۋتەرلىك ويلاۋ جانە باعدارلامالاۋ»، «دەنساۋلىق، قاۋىپسىزدىك جانە جي» بولىمدەرى اياسىندا 14 وقۋ ماقساتى قاراستىرىلعان. وقۋشىلار وقۋ پروسەسىندە جاساندى ينتەللەكت قۇرالدارىن ءتيىمدى پايدالانۋدى، سۇرانىستاردى دۇرىس قۇراستىرۋدى، الىنعان ناتيجەلەردى سىني تۇرعىدان باعالاۋدى، سونداي-اق كيبەرقاۋىپسىزدىك پەن اكادەميالىق ادالدىق قاعيداتتارىن ساقتاۋدى ۇيرەنەدى.
10-11 سىنىپتاردا «دەرەكتەردى باسقارۋ جانە جاساندى ينتەللەكت» ءبولىمى اياسىندا 12 وقۋ ماقساتى قاراستىرىلعان. نەگىزگى نازار جاساندى ينتەللەكتتىڭ جۇمىس ىستەۋ پرينسيپتەرىن تۇسىنۋگە جانە ونى پراكتيكالىق قولدانۋعا اۋدارىلعان. وقۋ مازمۇنىنا ماشينالىق وقىتۋ، نەيروجەلىلەر، دەرەكتەردى تالداۋ جانە قولدانبالى كريپتوگرافيا نەگىزدەرى ەنگىزىلگەن.
ۆەدومستۆو اتالعان پاندەر بويىنشا جاڭارتىلعان وقۋ باعدارلامالارى وتكەن وقۋ جىلىندا ءساتتى اپروباسيادان ءوتىپ، وڭ ساراپتامالىق قورىتىندى العانىن اتاپ ءوتتى. ءقازىر ولار بەلگىلەنگەن تارتىپپەن بەكىتۋ ساتىسىندا تۇر.