قازاقستانداعى «سىرىم» ۆەتەرينارلىق بەكەتىندە موڭعوليادان تاجىكىستانعا بارا جاتقان 20 توننا مۇزداتىلعان قوي ەتىن وتكىزۋگە جول بەرىلمەدى. ترانزيتكە ەپيزووتيالىق احۋالدىڭ ناشارلىعىنا بايلانىستى تىيىم سالىندى، دەپ حابارلايدى infohub.kz سايتى.
انىقتالعانداي، قوي ەتىن قازاقستان اۋماعى ارقىلى ترانزيتپەن وتكىزۋگە جۇك جونەلتىلگەن ەلدەگى ەپيدەميولوگيالىق احۋالدىڭ قولايسىزدىعىنا بايلانىستى تىيىم سالىنعان.
سونىمەن قاتار رەسەيدەن تۇركىستان وبلىسىنا 40 توننا بيداي كەبەكتەرىن ۆەتەرينارلىق نورمالاردى بۇزا وتىرىپ اكەلۋگە ارەكەت جاسالدى. تەكسەرۋ بارىسىندا جۇككە ىلەسپە قۇجاتتاردىڭ، تاڭبالاۋدىڭ جانە تەرميالىق وڭدەۋ راستاماسىنىڭ جوقتىعى انىقتالدى.
«جۇك كولىكتەرى جونەلتىلگەن باعىتقا قايتارىلدى. جۇرگىزۋشىلەرگە ق ر اكىمشىلىك قۇقىق بۇزۋشىلىق تۋرالى كودەكسىنىڭ 406-بابى بويىنشا اكىمشىلىك حاتتاما تولتىرىلىپ، ايىپپۇل سالىندى»، — دەپ ناقتىلادى اۋىل شارۋاشىلىعى مينيسترلىگىندە.
جالپى 2026 جىلدىڭ باسىنان بەرى «سىرىم» بەكەتىندە 249 بۇزۋشىلىق انىقتالىپ، بارلىق جۇك كولىگى كەرى قايتارىلدى. 117 ادامعا اكىمشىلىك حاتتاما تولتىرىلدى.
بۇعان دەيىن «كۋرسيۆ» قازاقستان رەسەيدىڭ شەكارالاس ءبىرقاتار وڭىرلەرىنەن ەت جانە ەت ونىمدەرىن اكەلۋگە ۋاقىتشا تىيىم سالعانىن جازعان بولاتىن. ۆەتەرينارلىق باقىلاۋ جانە قاداعالاۋ كوميتەتىنىڭ ءتوراعاسى قازبەك تاشيموۆتىڭ ايتۋىنشا، شەكتەۋلەر قازاقستان اۋماعىنا جانۋارلاردىڭ ءقاۋىپتى اۋرۋلارىنىڭ تارالۋىن بولدىرماۋ ءۇشىن ەنگىزىلىپ وتىر. قازىرگى تاڭدا ەلدەگى ەپيزووتيالىق احۋال تۇراقتى، الايدا شەكارالاس اۋماقتار بويىنشا تاۋەكەلدەر ۇنەمى باقىلاۋدا.