قازاقستان ۇشقىشسىز ۇشاقتار شابۋىلىنا بايلانىستى ۋاقىتشا توقتاتىلعان كاسپي قۇبىر كونسورسيۋمى (كقك) ارقىلى مۇناي ەكسپورتىن قايتا باستادى، دەپ حابارلايدى infohub.kz سايتى.
قازاقستان رەسپۋبليكاسى ەنەرگەتيكا مينيسترلىگىنىڭ ءباسپاسوز قىزمەتىنىڭ حابارلاۋىنشا، كقك جۇك جونەلتۋشىلەردەن مۇناي قابىلداۋدى جانە نوۆوروسسيسك پورتىنداعى تەڭىز تەرمينالى ارقىلى تيەۋ وپەراسيالارىن قايتا باستادى. «قازىرگى ۋاقىتتا كقك-تىڭ ەكى سىرتقى ايلاق قۇرىلعىسىندا SEAMAJESTY جانە MILOS تانكەرلەرىنە تيەۋ جۇرگىزىلۋدە. ەكى كەمە دە «تەڭىزشەۆرويل» ج ش س مۇنايىن قابىلداپ جاتىر. مۇناي قابىلداۋدىڭ قايتا باستالۋى مۇناي ءوندىرۋشى كومپانيالارعا شيكىزاتتى قۇبىر جۇيەسىنە جەتكىزۋدى جالعاستىرۋعا جانە تەڭىز تەرمينالى ارقىلى ەكسپورتتىق وپەراسيالاردى قايتا باستاۋعا مۇمكىندىك بەرەدى»، — دەلىنگەن ۆەدومستۆو حابارلاماسىندا.
تەڭىز تەرمينالىنداعى ودان ءارى وپەراسيالار قازىرگى جاعدايدى باعالاۋ جانە قاجەتتى قاۋىپسىزدىك تالاپتارىن ەسكەرە وتىرىپ جۇرگىزىلەتىنى اتاپ ءوتىلدى. «قازاقستان رەسپۋبليكاسى ەنەرگەتيكا مينيسترلىگى كقك باسشىلىعىمەن، ءىرى جۇك جونەلتۋشىلەرمەن جانە پروسەستىڭ باسقا دا قاتىسۋشىلارىمەن تۇراقتى بايلانىستا. ۆەدومستۆو جاعدايدى باقىلاپ، قازاقستاندىق مۇنايدىڭ ودان ءارى تاسىمالدانۋىن قامتاماسىز ەتۋگە باعىتتالعان ءىس-شارالاردى ۇيلەستىرۋدى جالعاستىرۋدا»، — دەپ ناقتىلادى ءباسپاسوز قىزمەتى.
ەسكە سالايىق، 20 شىلدەدە كقك تەڭىز تەرمينالىندا تيەۋ كەزىندە تۇرعان «NELSA» تانكەرى تاعى دا شابۋىلعا ۇشىرادى. ۇشقىشسىز ۇشاق سوققىسىنان كەمەدە ءورت شىقتى. بۇعان دەيىن كقك تەڭىز تەرمينالىنا ۇشقىشسىز ۇشاقتار شابۋىل جاساعانىن، سونىڭ سالدارىنان مۇناي تيەۋ توقتاتىلعانىن حابارلاعان بولاتىن. 23 شىلدەدە ەنەرگەتيكا مينيسترلىگى قارا تەڭىز اكۆاتورياسىندا كەمەلەردىڭ، ەكيپاجداردىڭ قاۋىپسىزدىگىن جانە ەكولوگيانى قامتاماسىز ەتۋ ماقساتىندا كقك تەڭىز تەرمينالىندا تيەۋ وپەراسيالارىن توقتاتقانىن مالىمدەدى.