قازاقستان ۇلتتىق قۇراماسىنىڭ ءتورت مۇشەسى دە تاشكەنتتە وتكەن 58ء-شى حالىقارالىق حيميا وليمپياداسىنىڭ (International Chemistry Olympiad، IChO 2026) جۇلدەگەرى اتاندى، دەپ حابارلايدى infohub.kz سايتى.
التىن مەدالدى وسكەمەندەگى نازاربايەۆ زياتكەرلىك مەكتەبىنىڭ 11-سىنىپ وقۋشىسى ايزەرە جەنيسحانوۆا جەڭىپ الدى. كۇمىس جۇلدەلەرگە ابيلمانسۋر كالي (استانا، نۇرا اۋدانىنداعى NIS، 11 سىنىپ)، دانيل پولەتايەۆ (الماتى، №134 ليسەي، 11 سىنىپ) جانە انسار جاكسىلىكوۆ (استانا، Spectrum International School، 11 سىنىپ) يە بولدى.
وليمپيادا الەمنىڭ 90-نان استام ەلىنەن 350-دەن اسا مىقتى وقۋشىنى بىرىكتىردى. بايقاۋ ەكى بەس ساعاتتىق كەزەڭنەن – تەوريالىق جانە پراكتيكالىق – تۇردى. قاتىسۋشىلار كۇردەلى حيميالىق ەسەپتەردى شىعارىپ، زەرتحانالىق جۇمىستار ورىندادى. ۇلتتىق قۇرامانى وڭتۇستىك كورەيانىڭ KAIST ۋنيۆەرسيتەتىنىڭ ستۋدەنتى، حالىقارالىق جانە رەسپۋبليكالىق وليمپيادالاردىڭ جەڭىمپازى سانجار ساماتۋلى بەگداير، سونداي-اق حيميا جانە ەكونوميكا ماگيسترى، حالىقارالىق جانە رەسپۋبليكالىق وليمپيادالاردىڭ جەڭىمپازى انۋار نۋرتازين دايىندادى.
حالىقارالىق حيميا وليمپياداسى الەمدەگى ەڭ بەدەلدى جەتى پاندىك وليمپيادانىڭ ءبىرى سانالادى. قازاقستان بۇل باسەكەگە 1998 جىلدان بەرى قاتىسىپ كەلەدى جانە ۇنەمى جوعارى ناتيجە كورسەتەتىن ەلدەر قاتارىندا. بۇعان دەيىن شىمكەنتتىك ءبىر وقۋشى الەمنىڭ 74 ۋنيۆەرسيتەتىنەن شاقىرۋ العانى حابارلانعان بولاتىن.