1 قازاندا كاليفورنياداعى ۆاندەنبەرگ بازاسىنان يلون ماسك نەگىزىن قالاعان SpaceX كومپانياسىنىڭ زىمىرانىمەن عارىشقا قازاقستاندىق وقۋشىلار جاساعان سپۋتنيك ۇشىرىلدى، دەپ حابارلايدى infohub.kz سايتى.
استانا قالاسىنىڭ نۇرا اۋدانىنداعى نازاربايەۆ زياتكەرلىك مەكتەبىنىڭ وقۋشىلارى جاساعان NIS PocketQube پيكوسپۋتنيگى تۋرالى ايتىلىپ وتىر. نزم مالىمەتىنشە، اپپاراتتىڭ وربيتاعا شىعۋى وقۋشىلاردى، ۇستازداردى جانە قازاقستان مەن شەتەلدىڭ عارىش سالاسى ماماندارىن بىرىكتىرگەن كوپجىلدىق ءبىلىم بەرۋ جانە ينجەنەرلىك جوبانىڭ ناتيجەسى بولدى.
جوبا بويىنشا جۇمىس 2019 جىلى وقۋشىلار عارىش تەحنولوگيالارىن تەك تەوريالىق تۇرعىدان عانا ەمەس، ناقتى عارىش اپپاراتىمەن جۇمىس ىستەي الاتىن ءبىلىم بەرۋ ورتاسىن قۇرۋ يدەياسىنان باستالدى. بەلسەندى كەزەڭ 2020 جىلى مەكتەپتە NIS Space عارىش زەرتحاناسى اشىلىپ، 7–10 سىنىپ وقۋشىلارىنا ارنالعان «عارىش تەحنيكاسىنىڭ ەلەكترونيكاسى» ارنايى كۋرسى ىسكە قوسىلعاندا باستالدى.
«NIS PocketQube — PocketQube فورماتىنداعى اسا شاعىن سپۋتنيك. ونىڭ ولشەمدەرى 5×5×5 سم، سالماعى 250 گ. شاعىن فورماتقا قاراماستان، اپپارات بورتتىق باسقارۋ، ەلەكتر قورەكتەندىرۋ جانە راديوبايلانىس جۇيەلەرىمەن، سونداي-اق كۇن پانەلدەرىمەن جابدىقتالعان»، — دەپ قوستى مەكتەپتە.
جوبانى ىسكە اسىرۋ بارىسىندا NIS PocketQube كومانداسىنا مەكتەپتىڭ 17 وقۋشىسى قاتىستى، ولاردىڭ ءبىر بولىگى بۇگىندە نزم تۇلەكتەرى.
«ولار سپۋتنيكتى 3D-مودەلدەۋمەن اينالىسىپ، جابدىقتىڭ ورنالاسۋىن ەسەپتەپ، ەلەكتروندىق پلاتالارمەن جانە SMD-كومپونەنتتەرمەن جۇمىس ىستەدى، ميكروكونتروللەرلەردى باعدارلامالادى، Python تىلىندە دەرەكتەردى وڭدەۋ الگوريتمدەرىن ازىرلەدى جانە اپپاراتتى جەردەگى سىناقتارعا دايىنداۋعا قاتىستى. بىرنەشە جىل ىشىندە كوماندا شاعىن عارىش اپپاراتىن جاساۋدىڭ العاشقى سىزبالار مەن پروتوتيپتەردەن باستاپ سىناقتار مەن ۇشۋ ۇلگىسىن ۇشىرۋعا دايىنداۋعا دەيىنگى تولىق سيكلىن دەرلىك ءوتتى. 2022 جىلدىڭ جەلتوقسانىندا اپپارات ۇلتتىق عارىش ورتالىعى بازاسىندا جەردەگى تەرموۆاكۋۋمدىق جانە مەحانيكالىق سىناقتاردان ءوتتى»، — دەپ اتاپ ءوتتى نزم-دە.
سپۋتنيكتەن الىنعان مالىمەتتەردى وقۋشىلاردىڭ فيزيكا، استرونوميا، باعدارلامالاۋ جانە ينجەنەرلىك پاندەر بويىنشا زەرتتەۋ جوبالارىندا پايدالانۋ جوسپارلانۋدا. اقپاراتتى قابىلداۋ جانە وڭدەۋ ءۇشىن قازاقستاننىڭ بارلىق وڭىرلەرىندەگى وقۋشىلارعا سپۋتنيكتىك دەرەكتەرگە قولجەتىمدىلىكتى قامتاماسىز ەتەتىن جەردەگى كەشەن ورناتىلادى.