جاپونيادا ءوتىپ جاتقان ازيا ويىندارىندا قازاقستاندىق پلياج ۆولەيبولشىلارى جارتىلاي فينالعا شىعا المادى: ەكى جۇپ تا شيرەك فينالداعى ماچتارىندا جەڭىلىس تاپتى، دەپ حابارلايدى infohub.kz سايتى.
مەرەي قوجاحمەت پەن لاۋرا قابىلبەكوۆا 1/4 فينالدا ازيا ويىندارىنىڭ ءۇش دۇركىن چەمپيونى سيني سيامەن كەزدەستى. قىتايلىق سپورتشى سيۋي يانمەن جۇپتاسىپ، قازاقستاندىق قىزدارعا مۇمكىندىك قالدىرمادى – 2:0.
قازاقستاندىقتار قاتىسقان جارتىلاي فينال جولداماسى ءۇشىن وتكەن ەكىنشى ماچ الدەقايدا تارتىستى بولدى. سەرگەي بوگاتۋ مەن كيريلل گۋرين پوراۆيد تاوۆاتو مەن پيتحاك تيپدجانمەن تەڭ دارەجەدە وينادى، الايدا شەشۋشى ساتتەردە تايلاندتىقتار دالىرەك بولىپ شىقتى.
ازيا ويىندارى-2026
پلياج ۆولەيبولى. 30 قازان
ايەلدەر. 1/4 فينال
🏐 مەرەي قوجاحمەت/لاۋرا قابىلبەكوۆا (قازاقستان) – سيني سيا/سيۋي يان (جۇڭگو) 0:2 (12:21، 15:21)
ەرلەر. 1/4 فينال
🏐 سەرگەي بوگاتۋ/كيريلل گۋرين (قازاقستان) – پوراۆيد تاوۆاتو/پيتحاك تيپدجان (تايلاند) 0:2 (19:21، 13:21)
قازاقستاننىڭ تاعى ەكى جۇبى ويىندارداعى ونەرىن بۇرىن اياقتاعان. كريستينا كاريموۆا مەن ەكاتەرينا ريۋحوۆا 1/8 فينالدا تايلاندتىق تاراۆادي نارافورنراپات/ۆوراپيراچايكورن كونگفوپسارۋتاۆادي جۇبىنا 0:2 (8:21، 7:21) ەسەبىمەن جول بەردى.
الدىن الا ىرىكتەۋدەن ابدۋلمادجيد موحامماد پەن دميتري ياكوۆليەۆ وتە المادى. توپتاعى بارلىق ماچتا جەڭىلىپ، جىگىتتەر پلەي-وففقا شىعا المادى.
پلياج ۆولەيبولى ازيا ويىندارىندا 1998 جىلى دەبيۋت جاسادى. ينچحون-2014 ويىندارىندا قازاقستاندىقتار الەكسەي سيدورەنكو مەن الەكساندر دياچەنكو التىن العان. بوگاتۋ مەن ياكوۆليەۆ حانچجوۋ-2022 ويىندارىندا قولا جۇلدەگە قول جەتكىزدى.
XX جازعى ازيا ويىندارى رەسمي تۇردە 19 قىركۇيەكتە اشىلىپ، 4 قازاندا اياقتالادى. 45 ەلدىڭ سپورتشىلارى قاتىساتىن جارىستا 460 كومپلەكت مەدال ساراپقا سالىنادى. ازيادا-2026 ويىندارىندا قازاقستان قۇراماسىنىڭ ساپىندا 35 سپورت تۇرىنەن 558 سپورتشى ونەر كورسەتۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما فايتەرى ەركىنعالي بۇركىتالين قوستى. التىنشىسىن – ونىڭ ارالاس جەكپە-جەكتەگى كوماندالاسى قادىربەك شىنبايەۆ. 23 قىركۇيەكتە لۋسەنكو اي-2026 ويىندارىنىڭ ەكى دۇركىن چەمپيونى اتاندى. سەگىزىنشى جوعارى سىناقتاعى مەدالدى 24 قىركۇيەكتە ەسكەكشىلەر ۆلاديسلاۆ ياكوۆليەۆ پەن يۆان چەرنۋحين ەرلەر اراسىنداعى جۇپ ەسكەكتى قايىقتار جارىسىندا جەڭىپ الدى. توعىزىنشى التىن مەدالدى ءبىزدىڭ شپاگاشىلار كومانداسى يەلەندى.
ويىنداردىڭ ون كۇنىنەن كەيىن قازاقستان بەيرەسمي مەدال ەسەبىندە سەگىزىنشى ورىندا تۇردى.