باتىس قازاقستان وبلىسىنداعى «سىرىم» ۆەتەرينارلىق باقىلاۋ بەكەتىندە ءونىم تاسىمالداۋ كەزىندە ءبىرقاتار زاڭبۇزۋشىلىق انىقتالدى — جۇك كولىكتەرى قازاقستان اۋماعىنا جىبەرىلمەدى، دەپ حابارلايدى infohub.kz سايتى.
اۋىل شارۋاشىلىعى مينيسترلىگىنىڭ مالىمەتىنشە، رەسەيدەن كەلگەن بيداي كەبەكتەرى مەن مۇزداتىلعان قوي ەتىن تاسىمالداۋ كەزىندە ۆەتەريناريالىق-سانيتاريالىق تالاپتار ساقتالماعان.
ءبىرىنشى جاعدايدا رەسەي فەدەراسياسىنىڭ ۋليانوۆسك وبلىسىنان تۇركىستان وبلىسىنا 40 توننا بيداي كەبەگى تاسىمالدانعان. تەكسەرۋ بارىسىندا ۆەتەريناريالىق ىلەسپە قۇجاتتاردىڭ، ءونىمنىڭ تەرميالىق وڭدەلۋىنىڭ جانە تاڭبالانۋىنىڭ جوقتىعى انىقتالدى.
«تاعى ءبىر جاعدايدا ۋلان-باتوردان (موڭعوليا) دۋشانبەگە (تاجىكستان) 20 توننا مۇزداتىلعان قوي ەتى تاسىمالدانعان. ەپيزووتيالىق احۋالى ناشار بولۋىنا بايلانىستى شەكتەۋلەر ەنگىزىلگەن رەسەي فەدەراسياسىنىڭ اۋماقتارىنان قازاقستان اۋماعى ارقىلى وسى ءونىمدى ترانزيتتىك وتكىزۋگە ۋاقىتشا شەكتەۋلەر قولدانىلعانى انىقتالدى»، — دەدى ۆەدومستۆودان.
ناتيجەسىندە جۇك كولىكتەرى جونەلتىلگەن باعىتقا قايتارىلدى. جۇرگىزۋشىلەرگە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 406-بابى بويىنشا اكىمشىلىك حاتتامالار تولتىرىلىپ، ايىپپۇل سالىندى. جۇك تاسىمالداۋشىلارعا ەۋرازيالىق ەكونوميكالىق وداقتىڭ ۆەتەريناريالىق-سانيتاريالىق تالاپتارى ءتۇسىندىرىلدى.
اۋىل شارۋاشىلىعى مينيسترلىگى جىل باسىنان بەرى وسى بەكەتتە 249 زاڭبۇزۋشىلىق انىقتالعانىن قوستى: 249 جۇك اۆتوكولىگى جونەلتىلگەن باعىتقا قايتارىلدى، 117 ادامعا اكىمشىلىك حاتتامالار تولتىرىلىپ، ايىپپۇل سالىندى.
ۆەدومستۆو جۇك تاسىمالداۋشىلار مەن سىرتقى ەكونوميكالىق قىزمەتكە قاتىسۋشىلاردى قازاقستان رەسپۋبليكاسىنىڭ جانە ەۋرازيالىق ەكونوميكالىق وداقتىڭ ۆەتەريناريالىق-سانيتاريالىق تالاپتارىن ساقتاۋعا شاقىردى.