ۇكىمەتتە قازاقستان مەن رەسەي شەكاراسىندا كولىك قۇرالدارىنىڭ ءوتۋىن جىلدامداتۋ شارالارى كۇشەيتىلەتىنى حابارلاندى، دەپ مالىمدەيدى infohub.kz سايتى.
پرەمەر-مينيستردىڭ ءبىرىنشى ورىنباسارى نۇرلىبەك ناليبايەۆ اۆتوموبيل وتكىزۋ پۋنكتتەرىندەگى احۋال مەن كولىك اعىنىن ۇيىمداستىرۋ تيىمدىلىگىن ارتتىرۋعا ارنالعان كەڭەس وتكىزدى. كەڭەس بارىسىندا ۇلتتىق قاۋىپسىزدىك كوميتەتىنىڭ شەكارا قىزمەتىنىڭ مەملەكەتتىك شەكاراداعى جاعداي جانە «الىمبەت»، «جايسان» جانە «سىرىم» وتكىزۋ پۋنكتتەرى ارقىلى اۆتوكولىك قۇرالدارىنىڭ جەدەل ءوتۋىن قامتاماسىز ەتۋ بويىنشا قابىلدانىپ جاتقان شارالار تۋرالى بايانداماسى تىڭدالدى.
قازاقستان تاراپىنداعى وتكىزۋ پۋنكتتەرى تاۋلىك بويى شتاتتىق رەجيمدە جۇمىس ىستەيتىنى اتاپ ءوتىلدى. قازاقستان اۋماعى ارقىلى ترانزيتتىك تاسىمالداۋدىڭ ماۋسىمدىق ءوسۋىن ەسكەرە وتىرىپ، ەۋرازيالىق ەكونوميكالىق وداقتىڭ ىشكى كونتۋرىنداعى اۆتوموبيل وتكىزۋ پۋنكتتەرىن ۋاقتىلى جاڭعىرتۋ باقىلاۋى كۇشەيتىلدى. بۇل باقىلاۋدان ءوتۋ ۋاقىتىن قىسقارتۋعا مۇمكىندىك بەرەدى.
جۇك تاسىمالداۋشىلاردىڭ جايلىلىعى ءۇشىن باسىم وتكىزۋ پۋنكتتەرىنىڭ جانىندا جۇرگىزۋشىلەرگە ارنالعان سەرۆيستىك كۇتۋ ايماقتارى قۇرىلادى، بۇل شەكارالىق باقىلاۋدى كۇتۋ كەزەڭىندە جۇرگىزۋشىلەردىڭ تۇرۋىنا قولايلى جاعداي جاسايدى. ءتيىستى جۇمىستاردى 2027 جىلى اياقتاۋ جوسپارلانۋدا.
كەڭەس قورىتىندىسى بويىنشا اۆتوكولىك قۇرالدارىنىڭ ۇزدىكسىز جانە جەدەل وتكىزىلۋىن قامتاماسىز ەتۋ جونىندە تاپسىرمالار بەرىلدى. وسى ماقساتتا كولىك مينيسترلىگى مۇددەلى مەملەكەتتىك جانە جەرگىلىكتى اتقارۋشى ورگاندارمەن بىرلەسىپ جەدەل شتابتار قۇردى. احۋال ۇكىمەتتىڭ باقىلاۋىندا.