قازاقستان-رەسەي شەكاراسىندا مىندەتتى ۆەتەرينارلىق ىلەسپە قۇجاتتارى جوق تاۋىق جۇمىرتقاسىنىڭ پارتياسىن اكەلۋ ارەكەتىنىڭ جولى كەسىلدى — بارلىعى 252 مىڭ دانا. بۇل تۋرالى اۋىل شارۋاشىلىعى مينيسترلىگى حابارلادى، دەپ جازادى infohub.kz سايتى.
بۇزۋشىلىق اقتوبە وبلىسىنداعى «جايساڭ» ۆەتەرينارلىق باقىلاۋ بەكەتىندە انىقتالدى. كولىك رەسەيدەن بايقوڭىرعا قاراي كەلە جاتقان.
تەكسەرۋ بارىسىندا ۆەتەرينارلىق باقىلاۋ جانە قاداعالاۋ كوميتەتىنىڭ اقتوبە وبلىستىق اۋماقتىق ينسپەكسياسى قىزمەتكەرلەرى تاسىمالدانىپ جاتقان پارتياعا قاجەتتى ۆەتەرينارلىق قۇجاتتاردىڭ جوقتىعىن انىقتادى.
بۇزۋشىلىق فاكتىسى بويىنشا اكت جانە اكىمشىلىك حاتتاما تولتىرىلدى. 252 مىڭ جۇمىرتقادان تۇراتىن بۇكىل پارتيا رەسەيگە قايتارىلدى.
تاسىمالداۋشىعا ۆەتەرينارلىق زاڭناما تالاپتارى مەن باقىلاۋداعى ءونىمدى مەملەكەتتىك شەكارا ارقىلى وتكىزۋ ەرەجەلەرى ءتۇسىندىرىلدى.
ۆەتەرينارلىق باقىلاۋ جانە قاداعالاۋ كوميتەتىندە باقىلاۋداعى ءونىمدى اكەلۋدى باقىلاۋ جالعاساتىنىن اتاپ ءوتتى.
بۇعان دەيىن «كۋرسيۆ» «الاتاۋ-قۇس» قۇس فابريكاسى الماتى وبلىسىندا اسىل تۇقىمدى رەپرودۋكتور سالۋعا 6،5 ملرد تەڭگە ينۆەستيسيالايتىنىن جازعان. كەشەن جىلىنا 12 ملن ينكۋباسيالىق جۇمىرتقا وندىرە الادى جانە كاسىپورىننىڭ اسىل تۇقىمدى ماتەريالدى شەتەلدەن اكەلۋگە تاۋەلدىلىگىن ازايتۋى ءتيىس.