ناگويادا ءوتىپ جاتقان X جازعى ازيا ويىندارىندا قازاقستاندىق سابليستەر كوماندالىق سايىستا قولا مەدال جەڭىپ الدى. قۇراما ساپىندا ارتەم ساركيسيان، نۇرمۇحاممەد جايلىباي، نازارباي ساتتارحان جانە قۋانىش ەرعاشباي ونەر كورسەتتى. ساركيسيان ءۇشىن بۇل — اتالمىش جارىستاعى ەكىنشى قولا جۇلدە، دەپ حابارلايدى infohub.kz سايتى.
قازاقستاندىق سابليستەر پەدەستالعا قاراي العاشقى اينالىمدا ساۋد ارابياسى قۇراماسىن سەنىمدى تۇردە جەڭۋدەن باستادى — 45:32. شيرەك فينالدا ءبىزدىڭ قىلىششىلار جۇڭگو كومانداسىن 45:40 ەسەبىمەن تىزە بۇكتىرىپ، كەمىندە قولا جۇلدەگە قول جەتكىزدى. الايدا فينالعا جولدامانى شەشكەن جارتىلاي فينالدا قازاقستاندىقتار جاپونيا قۇراماسىنا 34:45 ەسەبىمەن جول بەردى.
مەدالدان ءبىر قادام قالعاندا قازاقستاندىق راپيراشى قىزدار توقتادى. سوفيا اقتاەۆا، الينا يسكاندەروۆا جانە الەنا گنوەۆا تارتىستى باسەكەدە جۇڭگو قارسىلاستارىنا 36:40 ەسەبىمەن ۇتىلدى.
اعىمداعى تۋرنير باستالعانعا دەيىن قازاقستاننىڭ ازيادالارداعى قىلىش سپورتىنداعى قورجىنىندا ءۇش التىن، ءتورت كۇمىس جانە 13 قولا مەدال بولعان. ناگوياداعى ون ءتورتىنشى قولانى ساركيسيان جەڭىپ الدى، ون بەسىنشىسىن شپاگاشى قىزدار قۇراماسى، ون التىنشىسىن سابليستەر قۇراماسى اكەلدى. كيريلل پروحودوۆتىڭ ازيادا-2026-داعى مەدالى قازاقستاندىق كوماندانىڭ بەسىنشى كۇمىس جۇلدەسى بولدى.
ازيا ويىندارىنىڭ چەمپيونى اتانىپ، شپاگاشىلار قۇراماسى ەكى رەت توپ جارعان — 1994 جانە 2002 جىلدارى. ءدال وسى قارۋ تۇرىنەن دميتري الەكسانين ازيادا-2018-دە جەڭىسكە جەتكەن بولاتىن.
X جازعى ازيا ويىندارى رەسمي تۇردە 19 قىركۇيەكتە اشىلىپ، 4 قازاندا مارەسىنە جەتەدى. جارىسقا 45 ەلدىڭ سپورتشىلارى قاتىسىپ، 460 كومپلەكت جۇلدە ساراپقا سالىنۋدا. ازيادا-2026-دا قازاقستان قۇراماسىنىڭ نامىسىن 35 سپورت تۇرىنەن 558 سپورتشى قورعاۋدا.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. چەمپيون اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما سايىسكەرى ەركىنعالي بۇركىتالين، التىنشىسىن ونىڭ ارالاس جەكپە-جەكتەگى كوماندالاسى قادىربەك شىنبايەۆ سالدى. 23 قىركۇيەكتە لۋسەنكو ازيادا-2026-نىڭ ەكى دۇركىن چەمپيونى اتاندى. سەگىزىنشى جوعارى سىناپتاعى مەدالدى 24 قىركۇيەكتە ەسكەكشىلەر ۆلاديسلاۆ ياكوۆليەۆ پەن يۆان چەرنۋحين ەرلەر اراسىنداعى جۇپتىق ەسۋ سايىسىندا جەڭىپ الدى.
ويىنداردىڭ التى كۇنىنەن كەيىن قازاقستان بەيرەسمي مەدال ەسەبىندە ءتورتىنشى ورىندا تۇر.