مەملەكەتتىك تۋ بەينەسى بار قاپتاماداعى «قازاقستان» شوكولادىن وندىرۋشىلەر مەملەكەتتىك رامىزدەردى پايدالانۋدىڭ جاڭارتىلعان ەرەجەلەرىنە بايلانىستى ديزاينىن وزگەرتپەيدى، دەپ حابارلايدى infohub.kz سايتى.
ەسكە سالايىق، 7 شىلدەدە ۇكىمەت مەملەكەتتىك تۋدى پايدالانۋ جانە ورنالاستىرۋ ەرەجەلەرىن ناقتىلاپ، ءتيىستى قاۋلىعا وزگەرتۋلەر ەنگىزدى. تارماقتاردىڭ ءبىرى قازاقستان تۋىن جارناما ماقساتىندا پايدالانۋعا تىيىم سالادى.
وسىعان بايلانىستى ازاماتتاردا سۇراق تۋىندادى: تانىمال «قازاقستان» شوكولادىنىڭ قاپتاماسىن وزگەرتۋگە تۋرا كەلە مە؟ Threads الەۋمەتتىك جەلىسىندە قازاقستاندىقتار بۇل تۋرالى ءتىپتى ازىلدەستى. «قازاقستان تۋىن ەندى كيىمگە كيۋگە، داستارقانعا، توسەك جابدىقتارىنا بەينەلەۋگە جانە جارنامادا پايدالانۋعا تىيىم سالىندى. ال «قازاقستان» شوكولادى بۇل كەزدە: «پۋپۋپۋ»،— دەپ جازدى ءبىر پايدالانۋشى.
ءتىلشى مادەنيەت جانە اقپارات مينيسترلىگىنىڭ ءباسپاسوز قىزمەتىنە تۇسىنىكتەمە الۋ ءۇشىن جۇگىندى. وندا وزگەرتۋلەر بۇرىن وندىرىلگەن جانە ازاماتتىق اينالىمعا ەنگىزىلگەن ءونىمدى ساتۋعا تىيىم سالمايتىنىن ءتۇسىندىردى. «سونداي-اق، تاۋار مەن ونىڭ جارناماسىن اجىراتۋ قاجەت. ەگەر مەملەكەتتىك تۋ بەينەسى ءونىمنىڭ قولدانىستاعى قاپتاماسىنىڭ ەلەمەنتى بولسا، بۇل وزدىگىنەن زاڭ بۇزۋشىلىق بولىپ ەسەپتەلمەيدى. مەملەكەتتىك تۋدى جارنامادا پايدالانۋعا تەك مەملەكەتتىك رامىزدەر جانە جارناما تۋرالى زاڭناما تالاپتارى ساقتالعان جاعدايدا عانا جول بەرىلەدى. مىسالى، بۇرىن بەكىتىلگەن قاپتامامەن شىعارىلعان «قازاقستان» شوكولادىن ساتۋعا تىيىم سالىنبايدى»،— دەدى ۆەدومستۆودان.
مادەنيەت مينيسترلىگى جاڭا جارنامالىق ناۋقانداردى ازىرلەۋ كەزىندە وندىرۋشىلەرگە زاڭنامانىڭ جاڭارتىلعان تالاپتارىن ەسكەرۋ ۇسىنىلاتىنىن اتاپ ءوتتى.
بۇعان دەيىن مادەنيەت مينيسترلىگى مەملەكەتتىك رامىزدەردى پايدالانۋدىڭ جاڭا ەرەجەلەرى بويىنشا كوپشىلىك سۇراقتارىنا جاۋاپ بەرىپ، قازاقستان تۋى بار كيىم كيۋگە بولاتىنىن تۇسىندىرگەن ەدى. سونداي-اق، مەملەكەتتىك تۋدى پايدالانۋ ەرەجەلەرىن بۇزعانى ءۇشىن قانداي جاۋاپكەرشىلىك قاراستىرىلعانى حابارلانعان.