گونكونگتاعى سەمسەرلەسۋدەن الەم چەمپيوناتىنىڭ ەكىنشى جارىس كۇنى قازاقستان قۇراماسىنىڭ وكىلدەرى ءساتتى ونەر كورسەتتى. رۋسلان كۋربانوۆ، ەرلىك سەرتاي، كيريلل پروحودوۆ جانە ۆاديم شارلايموۆتان قۇرالعان ءتورت شپاگاشى مەن اناستاسيا گۋليك، ايگەريم سارىباي جانە كارينا دوسپايدان تۇراتىن ءۇش سابلياشى ىرىكتەۋدەن ءساتتى ءوتىپ، 26 شىلدەدە جۇلدەلەر ءۇشىن كۇرەسەدى، دەپ حابارلايدى infohub.kz سايتى.
جەكە سىندا جارىستان شىققان جالعىز قازاقستاندىق سپورتشى كايشا جانيبەك بولدى. ول 1/64 فينالدا ۋكراينالىق داريا گونسوۆاعا 6:15 ەسەبىمەن جول بەرىپ، 77-ورىنعا تۇراقتادى.
ءۇش سابلياشى دا توپتىق تۋرنيردە ءساتتى ونەر كورسەتتى. سودان كەيىن اناستاسيا گۋليك يتاليالىق كلاۋديو ءروتيليدى 15:14 ەسەبىمەن جەڭسە، كارينا دوسپاي گونكونگ وكىلى ۆينگ كيۋ چۋدى 15:13 ەسەبىمەن ۇتتى. ال ايگەريم سارىباي قىتايلىق چجايي ۆەيدى 15:11 ەسەبىمەن جارىستان شىعارىپ جىبەردى.
شپاگاشىلاردىڭ ءتورت وكىلى دە جۇلدەگە ءۇمىتىن ساقتاپ قالدى. ۆاديم شارلايموۆ توپتىق كەزەڭنەن كەيىن ءۇندىستاندىق شاۋريا ءاشۆينيدى (15:7) جانە شۆەد كەللي كريستوفەردى (12:11) جەڭدى. كيريلل پروحودوۆ وزبەكستاندىق جاۆوحيربەك نۋرماتوۆتان (9:8) جانە مىسىرلىق ماحمۋد ەل-سايدتان (15:9) باسىم ءتۇستى. رۋسلان كۋربانوۆ پەن ەرلىك سەرتاي جوعارى رەيتينگىنىڭ ارقاسىندا پلەي-وففتى 1/32 فينالدان باستايدى.
وتكەن الەم چەمپيوناتىندا تبيليسيدە كۋربانوۆ جەكە تۋرنيردە ۇزدىك وندىققا ەنسە، قازاقستاننىڭ شپاگامەن سەمسەرلەسۋ قۇراماسى كوماندالىق ەسەپتە قولا جۇلدەگە يە بولدى.
بيىلعى الەم چەمپيوناتى 71ء-شى رەت وتكىزىلىپ وتىر. العاشقى وسىنداي جارىس 1921 جىلى بولعان ەدى. گونكونگتا ەرلەر مەن ايەلدەر اراسىندا جەكە جانە كوماندالىق پاندەر بويىنشا (شپاگا، راپيرا، سابليا) جۇلدەلەردىڭ 12 جيىنتىعى ساراپقا سالىنادى.
ءتۋرنيردىڭ جۇلدە قورى 1،02 ميلليون اقش دوللارىن قۇرايدى. جەكە ەسەپتە جەڭىمپاز 40 مىڭ دوللار، كۇمىس جۇلدەگەر 20 مىڭ، قولا جۇلدەگەر 10 مىڭ دوللار الادى. كوماندالىق سىندا التىن 50 مىڭ، كۇمىس 25 مىڭ، قولا 15 مىڭ دوللار اكەلەدى.
كەشە راپيراشىلار مەن ايەلدەر شپاگاسىنىڭ الدىن الا جەكپە-جەكتەرى ءوتتى، ال ەرتەڭ سابلياشىلار مەن ايەلدەر راپيراسىنىڭ العاشقى جارىس كۇنى بەلگىلەنگەن.