قازاقستان ەۋرازيالىق ەكونوميكالىق وداق (ەاەو) نارىعىنا ەكسپورتتى ارتتىرۋ ءۇشىن تۇرمىستىق تەحنيكا ءوندىرىسىن ايتارلىقتاي ۇلعايتۋدى جوسپارلاپ وتىر، دەپ حابارلايدى infohub.kz.
قازاقستان رەسپۋبليكاسىنىڭ ونەركاسىپ جانە قۇرىلىس ءمينيسترى قانات شارلاپايەۆ ماجىلىستەگى ۇكىمەت ساعاتىندا ماشينا جاساۋ سالاسىندا 2024 جىلدىڭ ءبىرىنشى توقسانىندا ءوندىرىس كولەمى 24،9 پايىزعا وسكەنىن مالىمدەدى.
ونىڭ ايتۋىنشا، 2025 جىلعا قاراي مىناداي كورسەتكىشتەر جوسپارلانعان: تۇرمىستىق تەحنيكا شىعارۋ 360 مىڭ داناعا دەيىن ۇلعايتىلادى (ونىڭ ىشىندە «سيلك رواد ەلەكترونيكس» – 301 470 دانا، «الماتى تۇرمىستىق تەحنيكا زاۋىتى» – 60 000 دانا)؛ جەڭىل اۆتوموبيلدەر 160 مىڭ داناعا دەيىن (ج ش س «سارىارقااۆتوپروم» – 110 مىڭ، ج ش س «حوندە ترانس قازاقستان» – 50 مىڭ)؛ جولاۋشىلار ۆاگوندارى 100 داناعا دەيىن (زيكستو)؛ لوكوموتيۆتەر 120 داناعا دەيىن («ەلەكتروۆوز قۇراستىرۋ زاۋىتى» – 44 دانا، «لوكوموتيۆ قۇراستىرۋ زاۋىتى» – 90 دانا)؛ پلاتفورمالار 500 داناعا دەيىن (زيكستو)؛ جارتىلاي ۆاگوندار 1،5 مىڭ داناعا دەيىن (كۆك).
«ورتا مەرزىمدى پەرسپەكتيۆادا سالادا ەكىباستۇزدا تەمىرجول كلاستەرىن ودان ءارى دامىتۋ مىندەتى تۇر. مۇنداعى قولدانىستاعى وندىرىستەردە تەمىرجول كولىگى مەن ماگيسترالدىق تەمىرجول جولدارىنا ارنالعان ءونىمنىڭ بارلىق دەرلىك جەلىسى – ۇساق بۇيىمداردان جۇك جارتىلاي ۆاگوندارىنا دەيىن يگەرىلگەن»، – دەدى ق. شارلاپايەۆ.
مينيسترلىكتىڭ مالىمەتىنشە، كلاستەر اياسىنداعى جوبالاردى ىسكە اسىرۋ تەمىرجول ماشينا جاساۋدا، اتاپ ايتقاندا، جولاۋشىلار ۆاگوندارىن وندىرۋدەگى لوكاليزاسيا دەڭگەيىن 2030 جىلعا قاراي 50 پايىزعا جەتكىزۋگە مۇمكىندىك بەرەدى. سونىمەن قاتار، ەاەو نارىعىنداعى 9 ميلليون اقش دوللارى كولەمىندەگى تاپشىلىقتى ەسكەرە وتىرىپ، جاڭا ينۆەستورلاردى، ونىڭ ىشىندە قىتايلىق HKC كورپورەيشن جانە وڭتۇستىككورەيالىق «سامسۋنگ ەلەكترونيكس» كومپانيالارىن تارتۋ ەسەبىنەن تۇرمىستىق تەحنيكا شىعارۋدى ۇلعايتۋ جۇمىسى جۇرگىزىلۋدە. بۇل كومپانيالار ساران قالاسىنداعى قولدانىستاعى ج ش س «سيلك رواد ەلەكترونيكس» بازاسىندا 12 ميلليارد تەڭگە ينۆەستيسيا سالىپ، قۋاتتىلىعى 400 مىڭ داناعا دەيىن جەتەتىن ءوندىرىس ورنىن قۇرۋدى جوسپارلاپ وتىر.