قازاقستان ۇكىمەتى رەسەيمەن شەكاراداعى كولىك كەپتەلىسىنە بايلانىستى جەدەل كەڭەس وتكىزدى. «الىمبەت»، «جايسان» جانە «سىرىم» وتكىزۋ پۋنكتتەرىندە بىرنەشە شاقىرىمعا سوزىلعان كەزەك پايدا بولدى. وسىعان بايلانىستى كولىك مينيسترلىگى جەدەل شتابتار قۇردى، دەپ حابارلايدى infohub.kz سايتى.
ۇكىمەتتە قازاقستاندىق وتكىزۋ پۋنكتتەرى تاۋلىك بويى جۇمىس ىستەپ تۇرعانىن اتاپ ءوتتى. رەسپۋبليكا ارقىلى ترانزيتتىك تاسىمالداۋ كولەمىنىڭ ماۋسىمدىق ارتۋىنا بايلانىستى ۆەدومستۆولار ەاەو ەلدەرىمەن شەكاراداعى وتكىزۋ پۋنكتتەرىن جاڭعىرتۋ جۇمىستارىن كۇشەيتتى. بۇل باقىلاۋدان ءوتۋ ۋاقىتىن قىسقارتۋعا مۇمكىندىك بەرەدى.
«سونىمەن قاتار، جۇك تاسىمالداۋشىلارعا قولايلى جاعداي جاساۋ ءۇشىن باسىم وتكىزۋ پۋنكتتەرىنىڭ جانىندا جۇرگىزۋشىلەرگە ارنالعان سەرۆيستىك كۇتۋ ايماقتارى قۇرىلادى»، — دەپ قوستى ۇكىمەتتە.
بۇل جۇمىستاردى 2027 جىلى اياقتاۋ جوسپارلانۋدا.
ءبىرىنشى ۆيسە-پرەمەر نۇرلىبەك نالىبايەۆ شەكاراداعى اۆتوكولىك قۇرالدارىنىڭ ۇزدىكسىز جانە جەدەل ءوتۋىن قامتاماسىز ەتۋدى تاپسىردى. ۇكىمەت جاعدايدى ءوز باقىلاۋىنا الدى.
ال وتكىزۋ پۋنكتتەرىندە تۇرىپ قالعان ادامدار الەۋمەتتىك جەلىلەردە شەكارادا بەس ساعاتتان استام كەزەكتە تۇرعاندارىنا شاعىمدانۋدا.
«پەتۋحوۆو جاعىنان رەسەي مەن قازاقستان شەكاراسى. كەدەندە 5،5 ساعات بولدىق. سۋ ىشكىم كەلەدى (سۋ ءبىتتى) جانە ۇيىقتاعىم كەلەدى (ءبىراق بولمايدى). مۇندايدى العاش رەت كورىپ تۇرمىن. بۇل جولمەن قازاقستانعا كولىكپەن جۇرمەڭىزدەر»، — دەيدى كۋاگەرلەر.
ايتا كەتەيىك، بۇل جازبادا سولتۇستىك قازاقستان وبلىسىنداعى «جاڭا جول» وتكىزۋ پۋنكتى تۋرالى ايتىلىپ وتىر، ونداعى كەزەك جاعدايى دا وسىعان ۇقساس.
بۇعان دەيىن «كۋرسيۆ» پاۆلودار وبلىسىندا رەسەيمەن شەكارادا جۇك كولىكتەرىنىڭ جينالىپ قالعانىن جازعان بولاتىن.