ءۇندىستاندا كامەلەتكە تولماعان سپورتشىنى زورلادى دەگەن كۇدىكپەن قازاقستاندىق ۆەلوسپورت جاتتىقتىرۋشىسى ماقسات ايازبايەۆ ىزدەستىرىلىپ جاتىر. پوليسيا ونىڭ ءتولقۇجاتىن تاركىلەپ، ەلدەن شىعۋىنا جول بەرمەۋ ءۇشىن ىزدەۋ جاريالادى. قازاقستان ۆەلوسپورت فەدەراسياسى مالىمدەمە جاسادى، دەپ حابارلايدى infohub.kz سايتى.
Times of India باسىلىمىنىڭ مالىمەتىنشە، 34 جاستاعى ايازبايەۆ ءۇندىستان ۆەلوسپورت قۇراماسىنىڭ جاتتىقتىرۋشىسى بولىپ جۇمىس ىستەگەن. جەرگىلىكتى پوليسيانىڭ دەرەگىنشە، بولجامدى قىلمىس 13 قىركۇيەكتە پاتيالا قالاسىنداعى ۇلتتىق وزىق تاجىريبە ورتالىعىندا (NCOE) بولعان، وندا كامەلەتكە تولماعان ۆەلوشاباندوز وقۋ-جاتتىعۋ جيىنىنان ءوتىپ جاتقان.
سپورتشى ارىزدانعاننان كەيىن 18 قىركۇيەكتە پوليسيا بالالاردى جىنىستىق قىلمىستاردان قورعاۋ تۋرالى ءۇندىستاندىق POCSO زاڭىنا سايكەس قىلمىستىق ءىس قوزعادى.
پاتيالا پوليسياسىنىڭ اعا سۋپەرينتەندانتى حارمانديپ سينگح حانستىڭ ايتۋىنشا، ارىز تۇسكەننەن كەيىن ايازباەۆتىڭ ورنالاسقان جەرىن انىقتاۋ مۇمكىن بولماعان.
«ءبىز سپورتشىدان ارىز تۇسكەن بويدا قىلمىستىق ءىس قوزعادىق. سول كەزدە ايىپتالۋشى جاتتىقتىرۋشى دەليدە ەدى، سودان بەرى ونىڭ قايدا ەكەنى بەلگىسىز»، — دەدى حانس.
باسىلىمنىڭ دەرەگىنشە، پوليسيا قازاقستاندىقتىڭ ءتولقۇجاتىن تاركىلەپ، ونى ىزدەۋ ءۇشىن ەكى توپ قۇردى. سونداي-اق Look Out Circular — شەكارا جانە كوشى-قون قىزمەتتەرىنە ارنالعان، كۇدىكتىنىڭ ءۇندىستاننان كەتۋىنە كەدەرگى كەلتىرۋى ءتيىس حابارلاما شىعارىلدى. ىزدەۋ جۇمىستارى دەلي مەن ۇلتتىق استانالىق ايماقتا جۇرگىزىلىپ جاتقانى حابارلانادى.
ايازبايەۆ ءۇندىستان قۇراماسىمەن جاپونياداعى ازيا ويىندارىنا بارۋى ءتيىس ەدى، الايدا ءىس قوزعالعاننان كەيىن ساپارعا رۇقساتى جويىلدى. ءۇندىستان باسىلىمىنىڭ مالىمەتىنشە، ءۇندىستان ۆەلوسپورت فەدەراسياسى دا تەرگەۋ بارىسىندا جاتتىقتىرۋشىنى قىزمەتىنەن ۋاقىتشا شەتتەتتى.
قازاقستان ۆەلوسپورت فەدەراسياسى ايازباەۆتىڭ سوڭعى جىلدارى شەتەلدە جۇمىس ىستەگەنىن جانە ءقازىر قازاقستاندىق قۇراماعا قاتىسى جوق ەكەنىن اتاپ ءوتتى.
«ماقسات ايازبايەۆ سوڭعى جىلدارى قازاقستاننان تىس جەردە ءۇندىستاندىق تاراپپەن كەلىسىمشارت بويىنشا كاسىبي جۇمىس ىستەپ، ءۇندىستاننىڭ ۇلتتىق ۆەلوسپورت قۇراماسىن دايىنداۋمەن اينالىستى. ونىڭ كاسىبي قىزمەتى ءدال ءقازىر ءۇندىستاندىق قۇراماعا بايلانىستى بولدى. ءۇندىستاندىق ب ا ق تا ونىڭ ءۇندىستاندىق كوماندا قۇرامىنداعى جۇمىسى مەن سپورتشىلاردى حالىقارالىق جارىستارعا دايىنداۋى تۋرالى حابارلايدى. قازىرگى تاڭدا ماقسات ايازباەۆتىڭ قازاقستاننىڭ ۇلتتىق قۇراماسىنا قاتىسى جوق»، — دەلىنگەن حابارلامادا.
فەدەراسيا ءۇندىستانداعى تەرگەۋ اياقتالعانشا ءىستىڭ ءمان-جايىن باعالامايتىنىن قوستى.
«ءبىز ءۇندىستاننىڭ قۇزىرەتتى ورگاندارى رەسمي تەرگەۋدى اياقتاپ، ءىستىڭ بارلىق ءمان-جايىن انىقتاعانشا اسىعىس قورىتىندى جاساماۋ جانە باعا بەرمەۋ دۇرىس دەپ سانايمىز. قازاقستان ۆەلوسپورت فەدەراسياسىنىڭ ءۇندىستاندىق قۇقىق قورعاۋ ورگاندارى جۇرگىزىپ جاتقان تەرگەۋ ءمان-جايلارىن تۇسىندىرۋگە نەگىزى جوق جانە تەك قۇزىرەتتى ورگانداردىڭ رەسمي اقپاراتىنا سۇيەنەتىن بولادى. سونىمەن قاتار ناقتى ادامنىڭ ارەكەتتەرىن قازاقستاننىڭ ۇلتتىق ۆەلوسپورتى مەن ونىڭ قۇراما كومانداسىنىڭ قىزمەتىنەن اجىراتا ءبىلۋ ماڭىزدى»، — دەپ ەسەپتەيدى فەدەراسيادا.
ءۇندىستانداعى تەرگەۋ جالعاسۋدا. جاريالاۋ ساتىندە ايازباەۆتىڭ كىناسى سوتتا انىقتالماعان.
ماقسات ايازبايەۆ — بۇرىنعى قازاقستاندىق كاسىبي تاسجول ۆەلوشاباندوزى. سوڭعى جىلدارى ول جاتتىقتىرۋشى رەتىندە مانسابىن جالعاستىرىپ، قازاقستان ۆەلوسپورت فەدەراسياسىنىڭ دەرەگىنشە، ءۇندىستاندىق تاراپپەن كەلىسىمشارت بويىنشا جۇمىس ىستەگەن.
ءۇندىستانداعى تەرگەۋ جالعاسۋدا. جاريالاۋ ساتىندە ايازباەۆقا قاتىستى ايىپتاۋ ۇكىمى شىعارىلماعان.