قازاقستان ۆەلوسپورت فەدەراسياسى ءۇندىستاندا جاتتىقتىرۋشىنىڭ زورلاۋ ايىبىمەن ىزدەۋگە جاريالانعانى تۋرالى اقپاراتقا قاتىستى تۇسىنىكتەمە بەردى، دەپ حابارلايدى infohub.kz سايتى.
ءۇندىستاننىڭ Times of India باسىلىمى 34 جاستاعى قازاقستاندىق جاتتىقتىرۋشى ءۇندىستاننىڭ ۆەلوسپورت قۇراماسىندا جۇمىس ىستەگەنىن، پاتيالاداعى ۇلتتىق وزىق تاجىريبە ورتالىعىندا (NCOE) كامەلەتكە تولماعان ۆەلوشاباندوزدى زورلادى دەگەن ايىپپەن بالالاردى جىنىستىق قىلمىستان قورعاۋ تۋرالى زاڭ (POCSO) بويىنشا جاۋاپكەرشىلىككە تارتىلعانىن جازدى.
«پاتيالا پوليسياسى ايىپتالۋشى ماكسات ايازباەۆتى — قازاقستاننىڭ بۇرىنعى كاسىبي تاس جول ۆەلوشاباندوزى — ىزدەۋگە جاريالادى. پاتيالا پوليسياسىنىڭ اعا سۋپەرينتەندانتى حارمانديپ سينگح حانستىڭ ايتۋىنشا، وتكەن اپتادا ارىز تۇسكەننەن بەرى ونىڭ ورنى بەلگىسىز. پوليسيا ونىڭ ءتولقۇجاتىن تاركىلەپ، ونى ىزدەۋ ءۇشىن ەكى توپ قۇردى»، — دەلىنگەن باسىلىم حابارلاماسىندا.
قازاقستان ۆەلوسپورت فەدەراسياسى وسى فاكتىگە قاتىستى رەسمي Instagram پاراقشاسىندا مالىمدەمە جاريالادى. ماكسات ايازبايەۆ سوڭعى جىلدارى ءۇندىستان تاراپىمەن كەلىسىمشارت بويىنشا قازاقستاننان تىس جەردە كاسىبي جۇمىس ىستەپ، ءۇندىستاننىڭ ۇلتتىق ۆەلوسپورت قۇراماسىن دايىنداۋمەن اينالىسقان.
«ونىڭ كاسىبي قىزمەتى ءدال ءقازىر ءۇندىستان قۇراماسىمەن بايلانىستى بولدى. ءۇندىستاندىق ب ا ق تا ونىڭ ءۇندى كومانداسى ساپىنداعى جۇمىسى مەن سپورتشىلاردى حالىقارالىق جارىستارعا دايىنداعانى تۋرالى حابارلايدى. قازىرگى تاڭدا ماكسات ايازباەۆتىڭ قازاقستاننىڭ ۇلتتىق قۇراماسىنا قاتىسى جوق. جاريالانىمداردا كورسەتىلگەن وقيعالار ءۇندىستان اۋماعىندا ونىڭ ءۇندى تاراپىمەن جۇمىس ىستەگەن كەزەڭىندە بولعان جانە ءۇندىستاننىڭ قۇقىق قورعاۋ ورگاندارى قاراستىرىپ جاتىر»، — دەدى ۇيىمدا.
فەدەراسيادا ءقازىر ءۇندىستاننىڭ قۇقىق قورعاۋ ورگاندارى رەسمي تەرگەۋ جۇرگىزىپ جاتقانىن قوستى.
«قولدا بار اقپاراتقا قاراعاندا، قىلمىستىق ءىس قوزعالعان، ال ءۇندىستان ۆەلوسپورت فەدەراسياسى تەرگەۋ كەزەڭىندە ماماننىڭ قىزمەتىن توقتاتقان. رەسمي تەرگەۋ اياقتالىپ، ءۇندىستاننىڭ قۇزىرلى ورگاندارى ءىستىڭ بارلىق ءمان-جايىن انىقتاعانشا اسىعىس قورىتىندى جاساماۋ جانە باعا بەرمەۋ دۇرىس دەپ سانايمىز. قازاقستان ۆەلوسپورت فەدەراسياسى ءۇندىستاننىڭ قۇقىق قورعاۋ ورگاندارى جۇرگىزىپ جاتقان تەرگەۋ ءمان-جايلارىنا تۇسىنىكتەمە بەرۋگە نەگىزسىز جانە تەك قۇزىرلى ورگانداردىڭ رەسمي اقپاراتىنا سۇيەنەتىن بولادى»، — دەلىنگەن مالىمدەمەدە.
فەدەراسيادا ناقتى ادامنىڭ ارەكەتىن قازاقستاننىڭ ۇلتتىق ۆەلوسپورتىنىڭ جانە ونىڭ قۇراما كومانداسىنىڭ قىزمەتىنەن اجىراتا ءبىلۋ ماڭىزدى ەكەنىن قوستى.
«ب ا ق وكىلدەرى مەن الەۋمەتتىك جەلى قولدانۋشىلارىنان وسى اقپاراتتى جاريالاماس بۇرىن ەسكەرۋدى جانە بۇل جاعدايدى قازاقستاننىڭ ۇلتتىق قۇراماسىمەن نەگىزسىز بايلانىستىرۋعا جول بەرمەۋدى سۇرايمىز. ادامنىڭ كىنالىلىگى تەك زاڭدا كوزدەلگەن تارتىپپەن، رەسمي تەرگەۋ مەن سوت تالقىلاۋىنىڭ ناتيجەلەرى بويىنشا انىقتالۋى مۇمكىن»، — دەدى ۇيىمدا.
NUR.KZ ءتىلشىسى قازاقستاننىڭ سىم-نە سۇراۋ جولدادى.