قازاقستاندا ۆيزيت-ورتالىقتاردىڭ جۇمىس ىستەۋىنىڭ ءبىرىڭعاي ەرەجەسى كۇشىنە ەندى. ەندى تۋريستىك نىساندار مەن مارشرۋتتاردا ءقاۋىپ نەمەسە شەكتەۋلەر تۋىنداعان جاعدايدا، بۇل تۋرالى اقپارات الىنعان ساتتەن باستاپ ءبىر ساعاتتان كەشىكتىرمەي تۋريستەرگە حابارلانۋى ءتيىس، دەپ حابارلايدى infohub.kz.

تۋريزم جانە سپورت مينيسترلىگى بەكىتكەن جاڭا تالاپتار شەكتەۋلەر نەمەسە قاۋىپتەر تۋرالى مالىمەتتى ۆيزيت-ورتالىقتىڭ وزىندە دە، ونىڭ رەسمي سايتىندا دا جەدەل تۇردە ورنالاستىرۋدى كوزدەيدى. قۇجاتتا: «تۋريستىك نىساندارعا نەمەسە مارشرۋتتارعا بارۋ مۇمكىندىگىنە اسەر ەتەتىن جاعدايلار تۋىنداعان كەزدە ءتيىستى اقپارات ۆيزيت-ورتالىقتا جانە ونىڭ ينتەرنەت-رەسۋرسىندا الىنعان ساتتەن باستاپ ءبىر ساعاتتان كەشىكتىرىلمەي ورنالاستىرىلۋعا ءتيىس»، — دەلىنگەن.

ءبىرىڭعاي ستاندارت ۆيزيت-ورتالىقتاردىڭ قىزمەتتەر تىزبەسى مەن جۇمىس ءتارتىبىن دە رەتتەيدى. ولار ساياحاتشىلارعا كورىكتى جەرلەر، مارشرۋتتار جانە وڭىرلەردىڭ تۋريستىك الەۋەتى تۋرالى وزەكتى مالىمەتتەردى ۇسىنۋعا، كەلۋشىلەرگە كەڭەس بەرۋگە جانە تۋريستىك قىزمەتتەر كورسەتۋگە مىندەتتى. قىزمەت كورسەتۋ قازاق، ورىس جانە اعىلشىن تىلدەرىندە جۇزەگە اسىرىلادى. سونىمەن قاتار، ورتالىقتار مۇگەدەكتىگى بار ادامدار جانە باسقا دا قوزعالىسى شەكتەۋلى ازاماتتار ءۇشىن كەدەرگىسىز ورتا قۇرۋعا ءتيىس، ال قىزمەتكەرلەرگە كاسىبي دايارلىق پەن ەتيكا نورمالارىن ساقتاۋ تالاپتارى قويىلادى.

ۆيزيت-ورتالىقتاردىڭ جۇمىس كەستەسى تۋريستىك اعىن مەن ورنالاسقان جەرىنە بايلانىستى بولادى — ولار جىل بويى نەمەسە ماۋسىمدىق تۇردە جۇمىس ىستەي الادى. ورتالىقتاردىڭ جانىنان مەيرامحانالار، دۇكەندەر، تۇرۋ ورىندارى جانە باسقا دا سەرۆيستىك ينفراقۇرىلىمدى ورنالاستىرۋعا رۇقسات ەتىلەدى.

تۋريزم جانە سپورت مينيسترلىگىنىڭ پىكىرىنشە، ءبىرىڭعاي ەرەجەلەر بۇكىل ەل بويىنشا تۋريستىك قىزمەت ساپاسىن ارتتىرىپ، ساياحاتشىلاردىڭ ۋاقتىلى جانە دۇرىس اقپارات الۋىن قامتاماسىز ەتىپ، قازاقستان بويىنشا ساپارلاردى ىڭعايلى ءارى ءقاۋىپسىز ەتەدى.

بۇعان دەيىن «كۋرسيۆ» 1 تامىزدان باستاپ قازاقستاندا گيدتەر مەن ەكسكۋرسوۆودتار ءۇشىن ءبىرىڭعاي ەرەجەلەر ەنگىزىلگەنىن حابارلاعان بولاتىن. ەندى ولار تەك eLicense.kz پورتالىندا تىركەلگەن جانە سالىق تولەيتىن ق ر ازاماتتارى عانا بولا الادى. گيدتەر QR-كودى بار ارنايى بەيدجدەر تاعۋعا مىندەتتى.