قازاقستاننىڭ ەرلەر ۆولەيبول قۇراماسى جاپونيادا وتكەن XX جازعى ازيا ويىندارىنداعى سوڭعى كەزدەسۋىن يندونەزيانى جەڭۋمەن اياقتادى. 3 قازانداعى 11-ورىن ءۇشىن تالاستا قازاقستاندىقتار 3:1 ەسەبىمەن باسىم ءتۇستى، دەپ حابارلايدى infohub.kz سايتى.
سەرگەي تريكوز شاكىرتتەرى ءبىرىنشى پارتيادا ۇتىلىپ قالعانىمەن، كەيىنگى ۇشەۋىندە باسىمدىق تانىتتى. پارتيالار بويىنشا قورىتىندى ەسەپ — 23:25، 25:23، 25:18، 25:20.
كەزدەسۋدىڭ باستى كەيىپكەرى شابۋىلدا ۆلاديسلاۆ ماستيحين بولدى — ول قۇراماعا 19 ۇپاي اكەلدى. ازامات سەيلحانوۆتىڭ ەنشىسىندە 15 ۇپاي، اسىلحان يزبەرگەن ۇلى 14 ۇپاي جينادى.
ازيا ويىندارىنداعى ەرلەر ۆولەيبول ءتۋرنيرى 1958 جىلدان بەرى وتكىزىلىپ كەلەدى. ونى جيىرەك جاپوندىقتار جەڭىپ العان. قازاقستان قۇراماسى تۋرنير تاريحىندا جۇلدەگەرلەر قاتارىنا ەشقاشان كىرمەگەن. حانچجوۋداعى ازيادا-2022-دە ءبىزدىڭ كوماندا 9-ورىن العان بولاتىن.
XX جازعى ازيا ويىندارى رەسمي تۇردە 19 قىركۇيەكتە اشىلىپ، 4 قازاندا مارەسىنە جەتەدى. 45 ەلدىڭ سپورتشىلارى قاتىساتىن جارىستا 460 كومپلەكت مەدال ساراپقا سالىنۋدا. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى سىنعا تۇسۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۇلتانوۆا مەن الەكسەي لۋسەنكو، سونداي-اق كاراتيستەر جولامان بيگابىل مەن سوفيا بەرۋلسەۆا. قۇرامانىڭ قورجىنىنا بەسىنشى التىندى مما سايىسكەرى ەركىنعالي بۇركىتالين، التىنشىسىن — ارالاس جەكپە-جەكتەگى كوماندالاسى قادىربەك شىنبايەۆ سالدى. 23 قىركۇيەكتە لۋسەنكو ازيادا-2026-نىڭ ەكى دۇركىن چەمپيونى اتاندى. سەگىزىنشى جوعارى دارەجەلى مەدالدى 24 قىركۇيەكتە ەرلەر اراسىنداعى جۇپ ەسكەكتى قايىق جارىسىندا ۆلاديسلاۆ ياكوۆليەۆ پەن يۆان چەرنۋحين جەڭىپ الدى. توعىزىنشى التىن مەدالدى 27 قىركۇيەكتە شپاگا شەبەرلەرىنەن قۇرالعان كوماندا ولجالادى. 2 قازاندا التىندى بوكسشىلار تورەحان سابىرحان مەن ايبەك ورالباي، سونداي-اق تاەكۆوندوشى تاميرلان تىلەۋلەس يەلەندى.
ويىنداردىڭ 13 كۇنىنەن كەيىن قازاقستان بەيرەسمي مەدال ەسەبىندە سەگىزىنشى ورىندا تۇردى.