قازاقستاننىڭ جاستار فۋتبول قۇراماسى (U21) ەۋروپا چەمپيوناتىنىڭ 2027 جىلعى ىرىكتەۋىندە يرلانديادان سىرت الاڭدا ۇتىلدى. كورك قالاسىنداعى «تەرنەرس كروسس» ستاديونىندا وتكەن D توبىنىڭ ماچى 4:3 ەسەبىمەن الاڭ يەلەرىنىڭ پايداسىنا اياقتالدى، دەپ حابارلايدى infohub.kz سايتى.
جەڭىمپازدار ساپىندا قورعاۋشى الەكس ءمورفي (21-مينۋت)، جارتىلاي قورعاۋشى دجەيمي ماللينز (29-مينۋت) جانە پەنالتيدى ءدال ورىنداعان شابۋىلشى توماس لونەرگان (86-مينۋت) گول سوقتى.
قازاقستان قۇراماسىنان شابۋىلشى ءارتوم ليتوش (1-مينۋت)، قورعاۋشىلار رامازان كاريموۆ (38-مينۋت) جانە سۇلتان اسقاروۆ (52-مينۋت) كوزگە ءتۇستى. تاعى ءبىر قورعاۋشى ءالي تۇرعانوۆ اۆتوگولمەن ەرەكشەلەندى (48-مينۋت).
ەكىنشى تايمعا قوسىلعان ۋاقىتتا قوناقتار ەكىنشى سارى قاعاز الىپ، الاڭنان قۋىلعان ليتوشتىڭ ارقاسىندا ازشىلىقتا قالدى.
قازاقستان قۇراماسى ەۋرو-2027 ىرىكتەۋىندە قاتارىنان ءتورتىنشى رەت جەڭىلىس تاپتى. ءتورت ۇپايمەن كوماندا توپتا سوڭعى، التىنشى ورىندا تۇر. ىرىكتەۋ سيكلىنىڭ قورىتىندى ماچىن ول 6 قازاندا سىرت الاڭدا مولدوۆاعا قارسى وتكىزەدى.
يرلانديالىقتار 17 ۇپايمەن ەكىنشى ورىندا كەلەدى جانە كوش باستاپ تۇرعان انگليانى قۋىپ جەتۋ مۇمكىندىگى جوق.