قازاقستاندا 16 جاسقا تولماعان بالالاردىڭ الەۋمەتتىك جەلىلەرگە كىرۋىن شەكتەۋ جوسپارلانىپ وتىر. مادەنيەت جانە اقپارات ۆيسە-مينيسترى ەۆگەني كوچەتوۆ تاۋەلسىزدىك سارايىنىڭ كۋلۋارلارىندا باستامانىڭ ەگجەي-تەگجەيىن ايتىپ بەردى، دەپ حابارلايدى infohub.kz سايتى.
جۋرناليستەر ۆيسە-مينيستردەن ۆەدومستۆونىڭ بۇل ماسەلە بويىنشا ناقتى ۇستانىمى بار-جوعىن سۇرادى. ەۆگەني كوچەتوۆتىڭ ايتۋىنشا، زاڭ جوباسىندا ءقازىر ەكى نورما بار. «ءقازىر زاڭ جوباسىندا ەكى نورما بار. ءبىرىنشىسى – ماتەريالدىق نورما، ول 16 جاسقا تولماعان بالالارعا شەكتەۋ ەنگىزىلەتىنىن كورسەتەدى. ەكىنشى نورما ۆەريفيكاسياعا قاتىستى. ءبىز ۆەريفيكاسيانى ونلاين-پلاتفورمانىڭ ءوزى جۇرگىزەتىن تۇجىرىمدى ۇسىندىق»، – دەدى ول.
ونىڭ سوزىنشە، بۇل نورما الەمدىك تاجىريبەنى تالداۋدان كەيىن پايدا بولعان. «الەمدىك كۇن ءتارتىبىن باقىلاپ جۇرسەڭىز، كوپتەگەن ەلدەر ۆەريفيكاسيا مىندەتتەمەسىن وزدەرىنە، مەملەكەتكە العانىن بىلەسىز. وكىنىشكە قاراي، كوپتەگەن ەلدە بۇل تاجىريبە ناتيجە بەرمەدى. اۋستراليادا بۇل تولىققاندى جۇزەگە اسپاعانىن كوردىك، سەبەبى قۇجاتتارعا قاتىستى ماسەلەلەر تۋىندادى. مىسالى، فرانسيادا وسىنداي نورما ەنگىزىلگەندە جوعارعى كونستيتۋسيالىق سوت ونىڭ بۇلاي بولماۋى كەرەكتىگىن مالىمدەدى. ول ۇكىمەتكە قايتارىلىپ، پرەزيدەنت بۇل نورمانى جەدەل قايتا وڭدەۋدى تاپسىردى. سوندىقتان ءبىز ونلاين-پلاتفورمانىڭ ءوزى پايدالانۋشىلاردى ۆەريفيكاسيالاۋ مىندەتتەمەسىن الۋى كەرەك دەگەن قاعيداتتى ۇستاندىق»، – دەپ ءتۇسىندىردى ۆيسە-مينيستر.
ول سونداي-اق الەۋمەتتىك جەلىلەردە قىزىقتى كونتەنت جاريالاعىسى كەلەتىن بالالارعا قاتىستى سۇراققا دا جاۋاپ بەردى. «اتا-انالارعا بالالارى تۋرالى ايتۋعا ەشكىم تىيىم سالمايدى. ياعني مۇنى اتا-انانىڭ اككاۋنتى ارقىلى جاساۋعا بولادى. بۇل تالانتتى شەكتەۋ تۋرالى ەمەس، بالالاردىڭ داۋىسىن ازىراق ەستۋ تۋرالى ەمەس. ەڭ الدىمەن ولاردى پسيحولوگيالىق اسەردەن، كيبەربۋللينگتەن جانە الەۋمەتتىك جەلىلەر الىپ كەلەتىن باسقا دا قاۋىپتەردەن قورعاۋ تۋرالى. سوندىقتان قازاقستانداعى تالانتتى بالالاردىڭ سانى بۇل تۇزەتۋدەن كەمىمەيتىنىنە سەنىمدىمىز»، – دەدى كوچەتوۆ.
ەسكە سالايىق، 2025 جىلدىڭ جەلتوقسانىندا قازاقستاندا 16 جاسقا تولماعان بالالارعا الەۋمەتتىك جەلىلەرگە تىيىم سالۋ تۋرالى زاڭ جوباسى تالقىلاۋعا شىعارىلعانى بەلگىلى بولدى. وسى جىلدىڭ مامىرىندا كوچەتوۆ تۇزەتۋ جوباسى مەملەكەتتىك ورگاندارمەن كەلىسۋ ساتىسىندا ەكەنىن، سوندىقتان باستامانىڭ ەگجەي-تەگجەيى ءالى تالقىلانىپ جاتقانىن مالىمدەدى. جاقىندا پرەزيدەنت قاسىم-جومارت توقايەۆ تا 16 جاسقا تولماعان بالالاردىڭ الەۋمەتتىك جەلىلەرگە تىركەلۋىنە تىيىم سالۋ تۋرالى پىكىر ءبىلدىردى.