بيىل قازاقستاندا ۇيىمداسقان قىلمىستىق توپ مۇشەلەرىنە قاتىستى 45 قىلمىستىق ءىس سوتقا جەتتى. بۇل تۋرالى infohub.kz سايتى حابارلايدى.
ىشكى ىستەر مينيسترلىگىنىڭ اقپاراتتىق مەدياپورتالى ۇيىمداسقان قىلمىستىق توپتار (ۇقت) قۇرامىندا جاسالعان ەڭ اۋىر قىلمىستار بويىنشا ۇكىمدەردى جاريالادى.
ماسەلەن، قاراعاندى وبلىسىندا وڭىردەگى تاۋ-كەن بايىتۋ كاسىپورىندارىنان تاۋارلىق-ماتەريالدىق قۇندىلىقتاردى جىمقىرعان قىلمىستىق قاۋىمداستىقتىڭ ۇيىمداستىرۋشىسى مەن 10 مۇشەسىنە ۇكىم شىعارىلدى. سوت ولارعا 13 جىلعا دەيىنگى مەرزىمگە باس بوستاندىعىنان ايىرۋ جازاسىن تاعايىندادى.
«سونداي-اق وبلىستاعى ءىرى قالا قۇراۋشى كاسىپورىن اۋماعىنان جاسىرىن الاياقتىق سحەمالاردى پايدالانىپ، ۇقساس م ۇلىكتى جىمقىرۋ فاكتىلەرىنە قاتىسى بار ۇقت كوشباسشىسى مەن ءتورت مۇشەسىنە ايىپتاۋ ۇكىمى شىعارىلدى. ولارعا 10 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى»، — دەدى ۆەدومستۆودا.
الماتىدا كولىك قۇرالدارىن زاڭسىز تىركەۋگە، VIN-كودتار مەن اقپاراتتىق جۇيەلەردەگى دەرەكتەردى وزگەرتۋگە، سونداي-اق اۆتوموبيلدەردى ساتۋ كەزىندەگى الاياقتىققا قاتىسى بار ۇقت-نىڭ 13 مۇشەسى ۇزاق مەرزىمگە — 8 جىلعا دەيىن باس بوستاندىعىنان ايىرۋعا سوتتالدى.
« قىزىلوردادا جۇيەلى تۇردە بوپسالاۋمەن اينالىسقان، ونىڭ ىشىندە كاسىپكەرلەرگە قاتىستى 8 جەرگىلىكتى كريميناليتەت وكىلى سوتتالدى. تەرگەۋ بارىسىندا ولارعا ۇقت-نى باسقارۋ جانە ونىڭ قىزمەتىنە قاتىسۋ ايىپتالدى. سوت ۇكىمىمەن 11 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى»، — دەپ قوستى ءىىم.
ال استانادا ەسىرتكى زاتتارىن وتكىزگەنى ءۇشىن ۇقت-نىڭ ۇيىمداستىرۋشىسى مەن 5 مۇشەسى سوتتالدى. ۇيىمداستىرۋشى 17 جىلعا باس بوستاندىعىنان ايىرىلدى، ونىڭ سىبايلاستارى 16 جىلعا دەيىنگى مەرزىمگە سوتتالدى.