قازاقستان ىشىندەگى دەمالىس جەدەل قارقىنمەن قىمباتتاپ كەلەدى: 2026 جىلعى ماۋسىم قورىتىندىسى بويىنشا «دەمالىس جانە مادەنيەت» ساناتىنداعى باعالار جىلدىق كورسەتكىشتە 17،3%-عا ءوستى، بۇل ەلىمىزدەگى جالپى ينفلياسيادان شامامەن 7 پايىزدىق تارماققا جوعارى، دەپ حابارلايدى infohub.kz سايتى.
Energyprom ساراپشىلارىنىڭ ايتۋىنشا، جوعارى ءوسىم 2023 جىلدان بەرى بايقالىپ كەلەدى. 2017–2022 جىلدارى باعالار جىلىنا 3،8–8،3%-عا وسسە، سوڭعى ءۇش جىلدا كورسەتكىش 13،8–19% دەڭگەيىندە تۇر. مامانداردىڭ ناقتىلاۋىنشا، «دەمالىس جانە مادەنيەت» ساناتى تەك تۋريستىك ساپارلاردى عانا ەمەس، قوناق ءۇي قىزمەتتەرى، تۋريستىك جابدىقتار جانە باسقا دا دەمالىس تۇرلەرىن قامتيدى، سوندىقتان بۇل دەرەكتەردى تەك تۋريستىك ساپارلاردىڭ قىمباتتاۋى رەتىندە تۇسىنۋگە بولمايدى.
«كەشەندى دەمالىستى ۇيىمداستىرۋ» ساناتى ودان دا جىلدام قىمباتتاۋدا: ءبىر جىل ىشىندە باعالار 27،8%-عا، ال كەيبىر وڭىرلەردە 30%-دان استامعا ءوستى. وسىعان قاراماستان، ىشكى تۋريزم ءوسۋىن جالعاستىرۋدا. 2025 جىلى ورنالاستىرۋ ورىندارىندا 10،1 ملن ىشكى تۋريست تۇردى — بۇل ءبىر جىل بۇرىنعىدان ءبىر ميلليونعا جۋىق كوپ. ىشكى كەلۋشىلەردىڭ تۋريستىك ساپارلار كەزىندەگى شىعىندارى 659،2 ملرد تەڭگەنى قۇرادى. كولىك قىزمەتتەرىنە شىعىنداردىڭ 25،5%-ى، تاماقتانۋعا 20،8%-ى، ال ورنالاستىرۋعا 12،2%-ى تيەسىلى بولدى.
باعا ءوسىمى اياسىندا كۋرورتتار قوناقتاردى تارتۋدىڭ جاڭا تاسىلدەرىن ەنگىزۋدە. مىسال رەتىندە 2026 جىلى Oi-Qaragai تاۋ كۋرورتى ەنگىزگەن «وتان» ءتاريفىن الۋعا بولادى: قازاقستان ازاماتتارى ءۇشىن ءبىرقاتار قىزمەتتەرگە شەتەلدىك تۋريستەرمەن سالىستىرعاندا 20% جەڭىلدىك قاراستىرىلعان. 2026 جىلدىڭ ءبىرىنشى توقسانىنىڭ قورىتىندىسى بويىنشا ورنالاستىرۋ ورىندارى 2 ملن-عا جۋىق ادامعا قىزمەت كورسەتكەن، ال ولاردى ەل ىشىندە پايدالانعان قازاقستاندىقتار سانى 3،6%-عا وسكەن.
«حالىقارالىق تاجىريبە كورسەتكەندەي، جەرگىلىكتى تۇرعىندار ءۇشىن ارنايى جاعدايلار ىشكى سۇرانىستى قولداۋعا، تۋريستىك نىسانداردىڭ جۇكتەمەسىن رەتتەۋگە جانە حالىق شىعىندارىنىڭ ءبىر بولىگىن ۇلتتىق ەكونوميكا ىشىندە ۇستاپ قالۋعا كومەكتەسەدى»، — دەپ تۇيىندەيدى ساراپشىلار.