باتىس قازاقستان وبلىسىندا ايەلىنىڭ Instagram-داعى سۋرەتتەرىنە لايك باسقانى ءۇشىن بىرەۋگە پىشاق جۇمساعان ەر ادامعا ۇكىم شىعارىلدى، دەپ حابارلايدى infohub.kz سايتى.
باتىس قازاقستان وبلىسى سوتتارىنىڭ رەسمي Telegram-ارناسىندا جازىلعانداي، جانىبەك اۋداندىق سوتى قازاقستان رەسپۋبليكاسى قىلمىستىق كودەكسىنىڭ 106-بابىنىڭ 1-بولىگىندە كوزدەلگەن قىلمىستىق قۇقىق بۇزۋشىلىق جاسادى دەپ ايىپتالعان ازاماتقا قاتىستى قىلمىستىق ءىستى قارادى.
ءىس قىسقارتىلعان تارتىپپەن، اشىق سوت وتىرىسىندا، اۋديو-بەينەجازبا قولدانىلىپ، ەلەكتروندىق فورماتتا قارالدى.
سوت انىقتاعانداي، 2026 جىلعى 10 مامىردا شامامەن ساعات 02:00-دە سوتتالۋشى اۋىر دەنە جاراقاتىن كەلتىرۋ نيەتىمەن جابىرلەنۋشىمەن جانجالداسقان. جانجالدىڭ سەبەبى — جابىرلەنۋشىنىڭ ونىڭ زاڭدى ايەلىنە تيەسىلى Instagram پاراقشاسىنداعى سۋرەتتەرگە «ۇنايدى» بەلگىسىن (لايك) باسۋى.
جانجال بارىسىندا سوتتالۋشى قالتاسىنان الدىن الا دايىندالعان، اعاش تۇتقالى قوڭىر ءتۇستى قالتا پىشاعىن شىعارىپ، جابىرلەنۋشىگە قۋىق ايماعىنا ەكى رەت، جاۋىرىن ايماعىنا ءبىر رەت پىشاق سۇعىپ، سودان كەيىن وقيعا ورنىنان قاشىپ كەتكەن.
سالدارىنان جابىرلەنۋشىگە ىشكى مۇشەلەرى زاقىمدالعان، كىندىك ايماعىنداعى ءىشتىڭ الدىڭعى بەتىنەن وتەتىن پىشاق جاراقاتى تۇرىندە اۋىر دەنە جاراقاتى كەلتىرىلگەن.
سوتتالۋشى كىناسىن تولىق مويىنداپ، جاساعانىنا وكىنىپ، جابىرلەنۋشىدەن كەشىرىم سۇرادى جانە بۇدان بىلاي مۇنداي جاعداي قايتالانبايتىنىنا سوتقا ۋادە بەردى. ول باس بوستاندىعىنان ايىرىلماۋدى ءوتىندى.
مەملەكەتتىك ايىپتاۋشى سوتتالۋشىعا 3 جىلعا باس بوستاندىعىنان ايىرۋ جازاسىن تاعايىنداۋدى سۇرادى.
سوت سوتتالۋشىنى كىنالى دەپ تانىپ، وعان 3 جىلعا باس بوستاندىعىنان ايىرۋ جازاسىن تاعايىندادى.
سونىمەن قاتار قىلمىستىق كودەكستىڭ 63-بابىنا سايكەس تاعايىندالعان جازا شارتتى دەپ ەسەپتەلۋگە قويىلدى. 3 جىلعا پروباسيالىق باقىلاۋ بەلگىلەندى.
سوتتالعان ادامعا مىناداي مىندەتتەر جۇكتەلدى: پروباسيا قىزمەتىن حاباردار ەتپەي تۇراقتى تۇرعىلىقتى جەرىن جانە جۇمىس ورنىن وزگەرتپەۋ؛ الكوگولدىك ىشىمدىكتەر ساتىلاتىن قوعامدىق ورىندارعا (كافە، بار، مەيرامحانالارعا) بارماۋ؛ پروباسيا قىزمەتىن حاباردار ەتپەي تۇراقتى تۇرعىلىقتى جەرىنەن باسقا ەلدى مەكەندەرگە شىقپاۋ؛ تۇنگى ۋاقىتتا — ساعات 22:00-دەن 06:00-گە دەيىن — ۇيدە بولۋ؛ قاساقانا قۇقىق بۇزۋشىلىق جاساماۋ.
ۇكىم زاڭدى كۇشىنە ەندى.