كولىك مينيسترلىگى قازاقستاننىڭ بەس تەمىرجول باعىتىندا جولاۋشىلار ينتەرنەتكە قوسىلا الاتىنىن مالىمدەدى، دەپ حابارلايدى infohub.kz سايتى.
قازىرگى تاڭدا كەلەسى باعىتتارداعى جولاۋشىلار پويىزدارى ينتەرنەتپەن قامتاماسىز ەتىلگەن: قىزىلوردا – پاۆلودار، جەزقازعان – استانا، استانا – سەمەي، الماتى – دوستىق، قىزىلوردا – كوكشەتاۋ.
«سپۋتنيكتىك بايلانىستى پايدالانۋ تەمىرجولدىڭ ۇيالى وپەراتورلار قامتىلماعان ۋچاسكەلەرىندە دە ينتەرنەتكە تۇراقتى قوسىلۋدى قامتاماسىز ەتەدى. بۇل جولاۋشىلارعا مارشرۋتتىڭ بارلىق بويىندا مەسسەندجەرلەر، الەۋمەتتىك جەلىلەر، جۇمىس سەرۆيستەرى جانە باسقا ونلاين-پلاتفورمالاردى پايدالانۋعا مۇمكىندىك بەرەدى»، – دەدى كولىك مينيسترلىگىندە.
ۆەدومستۆودا تۇسىندىرگەندەي، قىزمەتكە قوسىلۋ ءۇشىن جولاۋشىلار پويىزداعى Wi-Fi جەلىسىن تاڭداپ، اۆتوريزاسيادان ءوتۋى ءتيىس. ودان كەيىن WhatsApp جانە Telegram-دا ماتىندىك حابارلامالار الماسۋ ءۇشىن تەگىن قوسىلۋدى پايدالانۋعا نەمەسە ينتەرنەت-رەسۋرستارعا، الەۋمەتتىك جەلىلەرگە، بەينەقىزمەتتەر مەن جۇمىس قوسىمشالارىنا تولىق قولجەتىمدىلىكتى قامتاماسىز ەتەتىن اقىلى ءتاريفتى رەسىمدەۋگە بولادى.
ۆەدومستۆو جولاۋشىلار پويىزدارىن ينتەرنەتپەن قامتاماسىز ەتۋدى باسىم باعىتتاردىڭ ءبىرى رەتىندە اتاپ ءوتتى.