قازاقستاننىڭ كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا ءتورت ناۋقاسقا ءميترالدى قاقپاقشانى رەكونسترۋكسيالاۋ بويىنشا از ءينۆازيۆتى وتا جاسالدى. بۇل تۋرالى دەنساۋلىق ساقتاۋ مينيسترلىگى حابارلادى، دەپ جازادى infohub.kz سايتى.
ءميترالدى قاقپاقشا سول جاق جۇرەكشە مەن سول جاق قارىنشا اراسىندا ورنالاسىپ، قاندى تەك ءبىر باعىتتا وتكىزەدى.
وتا جاسالعانداردىڭ بارلىعى حيرۋرگيالىق تاۋەكەلى جوعارى توپقا جاتتى، سوندىقتان ولارعا اشىق جۇرەككە كلاسسيكالىق ارالاسۋعا قارسى كورسەتىلىم بولدى.
وتالار ءميترالدى قاقپاقشانى ترانسكاتەتەرلىك رەكونسترۋكسيالاۋدىڭ «شەتىنەن-شەتىنە» (TEER) ءادىسى بويىنشا شەبەرلىك ساباعى اياسىندا جاسالدى.
TEER ءادىسىن قولدانعاندا دارىگەرلەر كەۋدە قۋىسىن اشپايدى جانە جاساندى قان اينالىمىن پايدالانبايدى. سان ۆەناسى ارقىلى جۇرەككە جىڭىشكە كاتەتەر ەنگىزىلەدى، ونىڭ كومەگىمەن ءميترالدى قاقپاقشاعا ارنايى كليپسا جەتكىزىلەدى. ول قاقپاقشانىڭ الدىڭعى جانە ارتقى جاپىراقشالارىن بىرىكتىرىپ، قاننىڭ كەرى اعىنىن ازايتادى. بۇعان دەيىن كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا وسى تەحنولوگيا بويىنشا وتالار جاسالعان.
«وتانىڭ ەرەكشەلىگى — ول جۇرەكتىڭ ۋلترادىبىستىق زەرتتەۋىنىڭ باقىلاۋىمەن، كونتراست ەنگىزبەي جاسالادى. وڭەش ارقىلى ۋدز قولدانىپ، ءبىز جۇرەكتىڭ قۇرىلىمىن تولىعىراق قارايمىز. سونداي-اق ءميترالدى قاقپاقشانىڭ 3D-بەينەسى قولدانىلادى، ونىڭ باقىلاۋىمەن كليپسا قاجەتتى جەرگە ورناتىلادى»، — دەدى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ فۋنكسيونالدىق جانە ۋلترادىبىستىق دياگنوستيكا ءبولىمىنىڭ مەڭگەرۋشىسى اقجان قونىسبەكوۆا.
كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ رەنتگەنەندوۆاسكۋليارلىق وتا بلوگىنىڭ مەڭگەرۋشىسى الەكسەي ەۆگەنەۆيچتىڭ ايتۋىنشا، مۇنداي ارالاسۋدان كەيىن ناۋقاستار تەز قالپىنا كەلەدى جانە كەلەسى كۇنى-اق توسەكتەن تۇرا الادى.
شەبەرلىك ساباعى اياسىندا ماماندار ءميترالدى قاقپاقشانى ترانسكاتەتەرلىك رەكونسترۋكسيالاۋدىڭ جاڭا DragonFly جۇيەسىن قولدانۋدى دا تالقىلادى. جۇڭگو عىلىم اكادەمياسىنىڭ اكادەميگى، پروفەسسور Wang Jian’an ونى ازىرلەۋ جانە كلينيكالىق قولدانۋ تاجىريبەسىمەن ءبولىستى.
شەتەلدىك ساراپشىلارمەن بىرگە قازاقستاندىق كارديولوگتار پروسەدۋرانىڭ تەحنيكالىق ەرەكشەلىكتەرىن تالقىلاپ، ارالاسۋلارعا ناۋقاستاردى ىرىكتەدى.