قازاقستاندا 20 تامىزدان باستاپ ۇيالى بايلانىس وپەراتورلارىنا قاتىستى جاڭا ەرەجەلەر كۇشىنە ەنەدى. ەندى ولار ابونەنتتەردى تاريفتەردىڭ كوتەرىلەتىنى تۋرالى كەمىندە ەكى اي بۇرىن حاباردار ەتۋگە مىندەتتى، دەپ حابارلايدى infohub.kz سايتى.
تەلەارنانىڭ مالىمەتىنشە، وزگەرىستەر بىرنەشە اسپەكتىنى قامتيدى. اتاپ ايتقاندا، وپەراتورلار باعانىڭ ءوسۋى تۋرالى حابارلامالاردى SMS تۇرىندە جىبەرۋگە، سونداي-اق قىزمەت قۇنىنىڭ وزگەرۋى تۋرالى اقپاراتتى ءوز ينتەرنەت-رەسۋرستارىندا الدىن الا ورنالاستىرۋعا مىندەتتى بولادى. بۇل ابونەنتتەرگە بۇرىنعى وپەراتوردا قالۋ نەمەسە نەعۇرلىم قولايلى جاعدايلاردى ىزدەۋ تۋرالى شەشىم قابىلداۋعا ۋاقىت بەرەدى.
سونىمەن قاتار، ۇيالى بايلانىس وپەراتورلارى الەۋمەتتىك جانە مەملەكەتتىك ماڭىزى بار ءموبيلدى قوسىمشالارعا تاۋلىك بويى تەگىن قولجەتىمدىلىكتى قامتاماسىز ەتۋگە مىندەتتەلەدى. ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ تەلەكوممۋنيكاسيالار كوميتەتى بايلانىس سالاسىنداعى مەملەكەتتىك ساياسات باسقارماسىنىڭ باسشىسى اينۇر بيسەنباەۆانىڭ تۇسىندىرۋىنشە، قازىرگى ۋاقىتتا مۇنداي قوسىمشالاردىڭ تىزبەسىن ايقىندايتىن زاڭعا تاۋەلدى اكت ازىرلەنۋدە. الدىن الا تىزبەگە eGov، eGov Business، eOtinish جانە Aitu قوسىمشالارى ەنەدى.
ساراپشىلاردىڭ پىكىرىنشە، ءتاريفتىڭ كوتەرىلەتىنى تۋرالى الدىن الا حابارلاۋ — قاجەتتى نورما. الايدا بايلانىس ساپاسى ءجيى سۇراق تۋعىزادى، سوندىقتان باسەكەلەستىكتى دامىتۋ ماڭىزدى، بۇل تاريفتەردى سيرەك كوتەرۋگە مۇمكىندىك بەرەدى. «جاڭا ويىنشىلار باسەكەلەستىك كۇرەستى كۇشەيتۋگە، ساپانى ارتتىرۋعا، ولاردىڭ قۇنىن تومەندەتۋگە مۇمكىندىك بەرەدى. ەكىنشى جاعىنان، قوعامدا زاماناۋي تەحنولوگيالاردان، سول 5G-دەن قورقۋ بار، وسى تۇرعىدا فوبيا بار، سوندىقتان مەملەكەت تەحنولوگيالاردىڭ ءقاۋىپ توندىرمەيتىنىن تۇسىندىرەتىن قۇرىلىم رەتىندە ارەكەت ەتە الادى»، — دەپ اتاپ ءوتتى ساراپشى قاليلاللو بايتاسوۆ.
20 تامىزدان باستاپ سمارتفونداردى تەكسەرۋ كۇشەيتىلەدى: ساتۋشىلار قۇرىلعىلاردى ساتۋعا دەيىن ۆەريفيكاسيالاۋعا مىندەتتى. وپەراتورمەن كەلىسىمشارت جاساسۋ ابونەنتتىڭ بيومەتريالىق اۋتەنتيفيكاسياسىنان كەيىن عانا مۇمكىن بولادى.