قازاقستاندا ساقتاندىرۋ كومپانيالارىنا اقشالاي تولەمنىڭ ورنىنا اۆتوكولىكتىڭ قالپىنا كەلتىرۋ جوندەۋىن تولەۋگە رۇقسات بەرۋ ۇسىنىلىپ وتىر. بۇل وزگەرىستەر قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى ازىرلەگەن «ساقتاندىرۋ نارىعى تۋرالى» زاڭ جوباسىندا قاراستىرىلعان، دەپ حابارلايدى infohub.kz سايتى.
جوبا بويىنشا ساقتاندىرۋشى زاقىمدالعان كولىكتى قالپىنا كەلتىرۋ جوندەۋىنە جىبەرە الادى، ونىڭ قۇنى زالالدى باعالاعاننان كەيىن ايقىندالادى. ءبىر ساقتاندىرۋ وقيعاسى بويىنشا ساقتاندىرۋشىنىڭ جاۋاپكەرشىلىگىنىڭ ەڭ جوعارى كولەمى 600 اەك، ياعني 2026 جىلى 2،595 ملن تەڭگەنى قۇرايدى. بۇل سومادان اسقان جاعدايدا اۆتوكولىك يەسى مەن ساقتاندىرۋ كومپانياسى قوسىمشا تولەمدى جەكە كەلىسە الادى.
جوندەۋ كەزىندە پايدالانىلعان نەمەسە قالپىنا كەلتىرىلگەن بولشەكتەردى قولدانۋعا بولمايدى، ەگەر تاراپتار وزگەشە كەلىسپەسە. سونداي-اق ساقتاندىرۋ كومپانيالارى تەحنيكالىق قىزمەت كورسەتۋ ستانسيالارىنىڭ ءتىزىمىن جانە ولاردىڭ مەكەنجايلارىن، سونداي-اق وزدەرى قابىلدايتىن اۆتوموبيلدەردىڭ ماركاسى مەن شىعارىلعان جىلدارىن جاريالاۋعا مىندەتتى بولادى.
جۇمىس مەرزىمى كولىك تەحنيكالىق قىزمەت كورسەتۋ ستانسياسىنا جەتكىزىلگەن ساتتەن باستاپ 30 جۇمىس كۇنىنەن اسپاۋى ءتيىس.
كەپىلدىكتە تۇرعان، جاسى ەكى جىلدان اسپايتىن اۆتوموبيلدەر ءۇشىن ءوندىرۋشىنىڭ نەمەسە ديلەردىڭ اۆتورلاندىرىلعان تەحنيكالىق قىزمەت كورسەتۋ ستانسياسىنا جىبەرۋ قاراستىرىلادى. جوندەۋ ساپاسىنا سەرۆيس جاۋاپتى بولادى، ال ورىندالعان جۇمىستارعا كەپىلدىك، ەگەر شارتتا ۇزاعىراق مەرزىم بەلگىلەنبەسە، كەمىندە التى ايدى قۇرايدى.
سونىمەن قاتار رەتتەۋشى قوسالقى بولشەكتەردىڭ، شىعىس ماتەريالدارىنىڭ جانە جۇمىستاردىڭ قۇنىن ءبىرىڭعاي انىقتامالىق جاساۋدى ۇسىنىپ وتىر. ول زالالدى ەسەپتەۋدى ءبىرىزدى ەتىپ، اۆتوكولىك يەلەرى مەن ساقتاندىرۋ كومپانيالارى اراسىنداعى داۋلاردى ازايتۋعا ءتيىس.
جوبا مىندەتتى ساقتاندىرۋدى جاساسۋ ەرەجەلەرىن دە وزگەرتەدى. ساقتاندىرۋشى تەك كولىك يەسى عانا ەمەس، ونىڭ كەلىسىمىمەن باسقا دا جەكە نەمەسە زاڭدى تۇلعا بولا الادى. بۇل رەتتە پوليسكە ءتيىستى ساناتتاعى جۇرگىزۋشى كۋالىگى جوق نەمەسە كولىك باسقارۋ قۇقىعىنان ايىرىلعان ادامداردى قوسۋعا بولمايدى.
بۇعان دەيىن كۋرسيۆ اۆتو قازاقستاندا ۇشقىشسىز كولىكتەر 60 ملن تەڭگەگە ساقتاندىرىلاتىنىن حابارلاعان بولاتىن.