قازاقستان جولدارىندا ءالى كۇنگە دەيىن Toyota، «ۆاز» جانە Hyundai ماركالى اۆتوكولىكتەر باسىم: وسى ءۇش برەندتىڭ ۇلەسىنە 1،5 ميلليوننان استام جەڭىل كولىك تيەسىلى، دەپ حابارلايدى infohub.kz سايتى.
قازاقستان رەسپۋبليكاسى ىشكى ىستەر مينيسترلىگىنىڭ دەرەكتەرىنە سايكەس، 2026 جىلعى 1 شىلدەدەگى جاعداي بويىنشا ەلىمىزدە شامامەن 5،1 ميلليون جەڭىل اۆتوكولىك تىركەلگەن. جىل باسىنان بەرى ولاردىڭ سانى 2،4 پايىزعا وسكەن.
سونىمەن قاتار، قازاقستاندىق اۆتوپارك الەمدەگى ەڭ «كارى» پاركتەردىڭ ءبىرى بولىپ قالا بەرەدى: جەڭىل كولىكتەردىڭ ورتاشا جاسى 19 جاسقا جەتەدى. ەڭ ەسكى كولىكتەر جامبىل وبلىسىندا پايدالانىلادى، مۇندا ورتاشا جاس 24 جىلدى قۇرايدى، ال ەڭ جاڭا كولىكتەر استانادا — بۇل كورسەتكىش 12 جىلعا تەڭ.
ايتا كەتەرلىگى، ەڭ كوپ تارالعان 15 برەندتىڭ ىشىندە تەك بىرەۋى عانا قىتايلىق — Changan. قازاقستان جولدارىندا وسى ماركانىڭ 92 441 اۆتوكولىگى تىركەلگەن.
سوڭعى جىلدارى جاڭا جۇڭگو كولىكتەرىنىڭ ساتىلىمى قارقىندى ءوسىپ جاتقانىنا قاراماستان، ەلىمىزدەگى اۆتوپاركتىڭ نەگىزىن ءالى دە جاپوندىق، رەسەيلىك، كورەيلىك جانە ەۋروپالىق برەندتەر قۇرايدى. بۇل جەڭىل كولىكتەردىڭ كوپشىلىگى جۇڭگو ماركالارىنىڭ قازىرگى «بۋمىنا» دەيىن اكەلىنىپ، تىركەلگەنىمەن تۇسىندىرىلەدى.
ءىىم دەرەكتەرى بويىنشا، 2026 جىلعى ماۋسىمدا قازاقستاندا شامامەن 167،9 مىڭ كولىك قۇرالى ەسەپكە قويىلعان — بۇل مامىرمەن سالىستىرعاندا 13،7 پايىزعا، ال بىلتىرعى جىلمەن سالىستىرعاندا 4،5 پايىزعا ارتىق. تىركەۋلەردىڭ كوپشىلىگى (87،4 پايىزى) جەڭىل اۆتوكولىكتەرگە تيەسىلى، ال ەڭ كوپ تارالعانى — قوزعالتقىش كولەمى 1،5–2 ليتر بولاتىن ماشينالار.
بۇعان دەيىن ەلىمىزدىڭ قاي وڭىرلەرىندە وتباسىلاردىڭ كولىگى ءجيى بولاتىنى بەلگىلى بولعان. سونداي-اق، Chevrolet قازاقستان اۆتورىنوگىندا كوشباسشىلىققا قايتا ورالعانى، ال Changan ۇزدىك ۇشتىككە ەنگەنى حابارلانعان.