قازاقستان رەسپۋبليكاسى عىلىم جانە جوعارى ءبىلىم مينيسترلىگى تامىز ايىنداعى ۇلتتىق ءبىرىڭعاي تەستىلەۋدەن (ۇبت) 27 مىڭنان استام ادام وتكەنىن حابارلادى. ورتاشا بالل 55 بولدى، دەپ حابارلايدى infohub.kz.
ۆەدومستۆونىڭ مالىمەتىنشە، شەكتى باللدى تالاپكەرلەردىڭ تەك 53%-ى جيناعان، ياعني 47%-ى ەڭ تومەنگى شەكتى دەڭگەيدەن وتە الماعان. بەس ءپان بويىنشا ورتاشا بالل 55، ال ەڭ جوعارى ناتيجە — 136 بالل بولدى.
تامىزداعى ۇبت-عا ەرەكشە ءبىلىم بەرۋ قاجەتتىلىكتەرى بار 98 تالاپكەر دە قاتىستى.
مينيسترلىكتە تەستىلەۋ كەزەڭىندە ەرەجە بۇزۋدىڭ 66 جاعدايى انىقتالعانىن اتاپ ءوتتى. ونىڭ ىشىندە سمارتفون، شپارگالكا جانە باسقا دا تىيىم سالىنعان زاتتاردى وتكىزۋگە تىرىسقانى ءۇشىن 30 تالاپكەر تەستىلەۋ مۇمكىندىگىنەن ايىرىلدى. تەستىلەۋ كەزىندە ەرەجە بۇزعانى ءۇشىن اۋديتوريادان 36 ادام شىعارىلدى. جالعان ادامدار انىقتالعان جوق.
ۇبت-2026 اياقتالعاننان كەيىن بەينەجازبالارعا تالداۋ كۇنتىزبەلىك جىلدىڭ 31 قازانىنا دەيىن جۇرگىزىلەتىن بولادى. تىيىم سالىنعان زاتتاردى پايدالانۋ نەمەسە ەرەجە بۇزۋ فاكتىلەرى انىقتالعان جاعدايدا، ۇبت ناتيجەلەرى جويىلادى.
سونىمەن قاتار، ءوز ماماندىعى بويىنشا جوعارى وقۋ ورنىندا اقىلى نەگىزدە وقۋدى جالعاستىرۋدى جوسپارلاپ وتىرعان كوللەدج تۇلەكتەرى اڭگىمەلەسۋ ناتيجەلەرى بويىنشا وقۋعا تۇسە الادى. بۇل جاعدايدا قابىلداۋ جوعارى وقۋ ورىندارىنىڭ قابىلداۋ كوميسسيالارى ارقىلى جۇزەگە اسىرىلادى.