قازاقستان سىرتقى ىستەر مينيسترلىگى بەس جىل ىشىندە وڭتۇستىك-شىعىس ازيادان ەڭبەك قۇلدىعىنىڭ قۇربانى بولعان 60-قا جۋىق ازاماتتى اكەلدى. بۇل تۋرالى ۆەدومستۆونىڭ «كۋرسيۆ» باسىلىمىنىڭ ساۋالىنا بەرگەن جاۋابىندا ايتىلعان، دەپ حابارلايدى infohub.kz.
قۇجاتتا اتاپ وتىلگەندەي، قازاقستاندىقتاردى كوبىنەسە وڭتۇستىك-شىعىس ازيانىڭ قىلمىستىق توپتارى ۇيىمداستىراتىن ەڭبەك قۇلدىعىنا تارتادى. نەگىزگى وشاقتار ميانما، لاوس جانە كامبودجانىڭ جەكەلەگەن اۋداندارىندا ورنالاسقان. ال تايلاند پەن ۆەتنام ترانزيتتىك ەلدەر رەتىندە پايدالانىلادى.
«وسى ورايدا مينيسترلىك ازاماتتارعا شەتەلدە جۇمىسقا ورنالاسۋ تۋرالى ۇسىنىستاردى مۇقيات تەكسەرۋدى، قۇجاتتاردى ءۇشىنشى تۇلعالارعا بەرمەۋدى جانە شەتەلگە شىققاندا ساقتىق شارالارىن ساقتاۋدى ۇسىنادى»، — دەپ اتاپ ءوتتى ءسىم.
ۆەدومستۆو قازاقستاندىقتار ءۇشىن اسا ءقاۋىپتى شەتەلدىك مەملەكەتتەردىڭ قارا ءتىزىمىن جۇرگىزبەيدى. ونىڭ ورنىنا ءسىم ازاماتتارعا باراتىن ەل تۋرالى وزەكتى اقپاراتپەن الدىن الا تانىسۋدى، جەرگىلىكتى زاڭناما تالاپتارىن ساقتاۋدى جانە توتەنشە جاعداي تۋىنداعان جاعدايدا قازاقستاننىڭ جاقىنداعى شەتەلدىك مەكەمەسىنە دەرەۋ حابارلاسۋدى ۇسىنادى.
بۇعان دەيىن «كۋرسيۆ» باسىلىمى قازاقستاندا كىمدەر قۇلدىققا ءجيى تۇسەتىنى جانە قانداي سەبەپتەرمەن ەكەنىن حابارلاعان بولاتىن.