قازاقستاندىق الەۋمەتتىك جەلىلەردە جاساندى ينتەللەكت ارقىلى جاسالعان ۆيدەولارعا قاتىستى نارازىلىق تولقىنى كۇشەيىپ بارادى: اۆتورلار كاسپي تەڭىزىندەگى وقۋ-جاتتىعۋ كەزىندە قازا تاپقان اسكەريلەردى «ءتىرىلتىپ»، ولاردىڭ قازا بولۋ ساتتەرىن كورىنىس پەن لايك ءۇشىن قايتا جاڭعىرتىپ ءجۇر، دەپ حابارلايدى infohub.kz سايتى.
مۇنداي كادرلار قولدانۋشىلاردىڭ ەكىۇداي رەاكسياسىن تۋدىردى. ولار بۇل جاريالانىمداردى امورالدى جانە قازا تاپقانداردىڭ وتباسىلارى ءۇشىن اۋىر جاراقات دەپ اتاپ، ايىپتايدى.
بلوگەر ءالي-اسقار بايعوجين بەينەجازبا جاريالاپ، وندا قازا تاپقان اسكەريلەردىڭ اتا-انالارىنا قۇرمەت كورسەتۋ كەرەكتىگىن ايتتى. ونىڭ سوزىنشە، ولارعا ءقازىر ونسىز دا قيىن.
«سىزدەر الىپ، وسىنداي ۆيدەولار جاساپ جاتىرسىزدار. ادامگەرشىلىك دەگەن بولۋى كەرەك قوي، بۇلاي ىستەۋ ادەپسىزدىك. بۇل دۇرىس ەمەس، بالالار، ولاي جاساماڭدار. ولاي جاساۋعا بولمايدى، بىلمەيمىن، مۇمكىن وسىلاي قامتۋدى كوتەرگىلەرىڭ كەلەدى مە؟ بىلمەيمىن، الدە وزدەرىڭدى جارنامالاپ جۇرسىڭدەر مە؟ مۇندايدى ىستەۋدىڭ قاجەتى جوق، بۇل — ولىكتىڭ ۇستىندە بيلەۋ»، — دەپ نارازىلىق ءبىلدىردى ول.
وسىعان ۇقساس پىكىردى رەجيسسەر رۇستەم وماروۆ تا ايتتى. ول الەۋمەتتىك جەلىلەردە وزگەنىڭ قايعىسى كونتەنت ەمەس ەكەنىن جازدى.
«قازا تاپقان ساربازداردى جي كومەگىمەن «ءتىرىلتىپ»، سويلەتىپ، ودان روليك جاساۋ كەرەك دەپ ويلامايمىن. بۇل كونتەنت ەمەس. ولار — بىرەۋدىڭ ۇلدارى، اعالارى، كۇيەۋلەرى. ولاردىڭ جاقىندارىنا ءقازىر ونسىز دا وتە قيىن. يماندى بولسىن»، — دەيدى ول.
پىكىرلەردە ادامدار جاقىندارى ءالى جەرلەپ ۇلگەرمەي، اۋىر قايعىنى باستان كەشىپ جاتقاندا مۇنداي كونتەنت جاساۋدىڭ قاتىگەزدىك جانە ادامگەرشىلىككە جاتپايتىنىن اتاپ وتەدى. كوپشىلىك اۆتورلاردىڭ وزگەنىڭ قايعىسىن تەك قامتۋ مەن لايك قۋۋ ءۇشىن پايدالانىپ جاتقانىن ايتادى. قولدانۋشىلار ادامداردىڭ بەينەسىن جاقىندارىنىڭ كەلىسىمىنسىز پايدالانۋعا تىيىم سالاتىن زاڭدار مەن نورمالاردىڭ بۇزىلعانىن كورسەتەدى.
سونداي-اق پىكىرلەردە وسىنداي اۆتورلاردىڭ اككاۋنتتارىنا شاعىمدانۋعا جانە ولاردى بۇعاتتاۋعا شاقىرادى. پىكىر قالدىرۋشىلار قازا تاپقان ساربازداردىڭ اتا-انالارى جي-ۆيدەولاردى جاريالاماۋدى تىكەلەي سۇراعانىن اتاپ وتەدى.
«كەلىسەمىن. ولار قايعىرىپ جۇرگەن ادامداردىڭ ەسەبىنەن حايپ جاساپ ءجۇر»
«كەيبىرەۋلەر كىم كوبىرەك ايانىشتى ۆيدەو جاسايدى دەپ جارىسىپ جاتقانداي، جالپى اقىلدان ادا بولعان سياقتى. اسكەريلەردىڭ سۋعا باتىپ بارا جاتقان كادرلارىن جاريالاپ جاتىر، جاي عانا قورقىنىش. وسىندايلاردى جازالاي باستايدى دەپ ۇمىتتەنەمىن»
«مەن ادامدارعا تاڭ قالدىم، كيەلى ەشتەڭە جوق! كوپتەگەن روليكتەردى كوردىم، لەنتادا سۋعا باتىپ بارا جاتقانىن كورسەتەدى. بۇل قالىپتى ەمەس! بۇل امورالدى، ەستەرىڭە كەلىڭدەر!»، — دەپ جازادى قولدانۋشىلار.
24 قىركۇيەكتە كاسپيدە اسكەري-تەڭىز كۇشتەرىنىڭ وقۋ-جاۋىنگەرلىك تاپسىرمالارىن ورىنداۋ بارىسىندا كەنەتتەن شىققان داۋىل مەن ەكپىندى جەلدەن 17 اسكەري قىزمەتشى اشىق تەڭىزگە اعىپ كەتتى. وقيعا سالدارىنان 14 ادام قازا تاپتى.
بۇعان دەيىن Kursiv LifeStyle ماڭعىستاۋ وبلىسىندا قازا تاپقان اسكەري قىزمەتشىلەرگە قاتىستى بۇگىن قازاقستان جالپىۇلتتىق ازا تۇتۋعا بىرىككەنىن جازعان بولاتىن. تەرەڭ قايعى مەن قۇرمەت بەلگىسى رەتىندە ەلدىڭ مادەني ءومىرى ءۇزىلىس جاسايدى — ۇيىمداستىرۋشىلار مەن ارتىستەر وسى كۇنگە جوسپارلانعان بارلىق شوۋ، كونسەرتتەر مەن سپەكتاكلدەردى جاپپاي كەيىنگە شەگەرىپ جاتىر.