قازاقستاندا قوعامدىق ورىنداردا كولىكتەرىندە بىلاپىت سوزدەرى بار قاتتى مۋزىكا قوسقان جۇرگىزۋشىلەرگە اكىمشىلىك قاماۋ ءقاۋپى ءتونىپ تۇر، دەپ حابارلايدى infohub.kz سايتى.
ىشكى ىستەر مينيسترلىگىندە تۇسىندىرگەندەي، قوعامدىق ورىنداردا كولىكتەن نەمەسە ءپورتاتيۆتى كولونكالاردان بىلاپىت سوزدەرى بار اندەردى قوسۋ قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 434-بابى — «ۇساق بۇزاقىلىق» بويىنشا سارالانادى. مۇنداي بۇزۋشىلىق ءۇشىن 20 ايلىق ەسەپتىك كورسەتكىش (2026 جىلى 86،5 مىڭ تەڭگە) مولشەرىندە ايىپپۇل نەمەسە 15 تاۋلىككە دەيىن اكىمشىلىك قاماۋعا الۋ قاراستىرىلعان. قايتالانعان بۇزۋشىلىق كەزىندە جۇرگىزۋشى 20 تاۋلىككە قامالۋى مۇمكىن.
ەگەر قاتتى مۋزىكا تۇنگى ۋاقىتتا ويناتىلسا، جۇرگىزۋشىنىڭ ارەكەتتەرى ق ر اقبتك-نىڭ 437-بابى — «تىنىشتىقتى بۇزۋ» بويىنشا قوسىمشا سارالانۋى مۇمكىن. بۇل جۇمىس كۇندەرى ساعات 22:00-دەن 09:00-گە دەيىن، ال دەمالىس جانە مەرەكە كۇندەرى ساعات 23:00-دەن 09:00-گە دەيىنگى كەزەڭدى قامتيدى.
قوعامدىق ورىندارعا كوشەلەر، ساياباقتار، تۇرعىن ۇيلەردىڭ پودەزدەرى، عيماراتتاردىڭ حوللدارى جانە قوعامدىق كولىك جاتادى. پوليسيا مۇنداي بۇزۋشىلىقتاردى ازاماتتاردىڭ وتىنىشتەرى بويىنشا عانا ەمەس، پاترۋلدەۋ كەزىندە، سونداي-اق الەۋمەتتىك جەلىلەردى مونيتورينگىلەۋ ارقىلى دا انىقتاي الادى.
بۇعان دەيىن «كۋرسيۆ اۆتو» باسىلىمى 2027 جىلدىڭ 1 قاڭتارىنان باستاپ ايىپپۇلدار، ۋتيلسبور، كولىكتى تىركەۋ قۇنى جانە اۆتوساقتاندىرۋ قانشالىقتى وسەتىنى تۋرالى حابارلاعان بولاتىن.