جول بويىندا تەگىن دارەتحانا بولسا دا، ونى پايدالانۋ ءاردايىم كەپىلدىك ەمەس. «قازاۆتوجول» ۇلتتىق كومپانياسى جۇرگىزۋشىلەر مەن جولاۋشىلارعا ەرەكشە وتىنىشپەن جۇگىندى – رەسپۋبليكالىق تراسسالارداعى سانيتارلىق توراپتاردىڭ عيماراتتارىنىڭ ارتىنا دارەت جاساۋدى توقتاتۋدى سۇرادى، دەپ حابارلايدى infohub.kz سايتى.
كومپانيادا تۇسىندىرگەندەي، رەسپۋبليكالىق جولداردا جىلى جانە سۋىق دارەتحانالار جۇمىس ىستەيدى، ولاردى بارلىق ساياحاتشىلار تەگىن پايدالانا الادى. الايدا كەيبىر نىسانداردا ادامدار ءوز كەزەگىن كۇتپەي، دارەتحانا عيماراتىنىڭ ارتىنا دارەت جاساۋدى ءجون كورەدى. وسىعان بايلانىستى اۋماق لاستانىپ، جاعىمسىز ءيىس، قوقىس جانە انتيسانيتاريا پايدا بولادى.
«قازاۆتوجولدا» جول دارەتحانالارى جالپى پايدالانۋعا ارنالعانىن ەسكە سالىپ، قاراپايىم ەرەجەلەردى ساقتاۋدى سۇرادى. جۇرگىزۋشىلەر مەن جولاۋشىلاردى ازداپ كۇتۋگە تۋرا كەلسە دە، سانيتارلىق توراپتاردى پايدالانۋعا، ارتىنا قوقىس پەن دارەتحانا قاعازىن تاستاماۋعا، م ۇلىككە ۇقىپتى قاراۋعا جانە تازالىقتى ساقتايتىن قىزمەتكەرلەردىڭ ەڭبەگىن قۇرمەتتەۋگە شاقىردى.
«جولداعى تازالىق ءارقايسىمىزدان باستالادى. سانيتارلىق ايماقتاردى جول قوزعالىسىنىڭ بارلىق قاتىسۋشىلارى ءۇشىن تازا ءارى ىڭعايلى ەتىپ ساقتايىق»، – دەلىنگەن ۇندەۋدە.