2025 جىلدىڭ قورىتىندىسى بويىنشا فوسفوريت كەنىن وندىرۋمەن جانە تىڭايتقىش شىعارۋمەن اينالىساتىن «كازفوسفات» كومپانياسىنىڭ شىعىنى 14،65 ملرد تەڭگەنى قۇرادى. كومپانيا يەلەرىنىڭ قاتارىندا رەسەيلىكتەر، ميللياردەر ۆلاديمير كيم جانە ءماجىلىس ەكس-سپيكەرى نۇرلان نيگماتۋلليننىڭ ۇلدارى بار، دەپ حابارلايدى infohub.kz سايتى.
2025 جىلعى ەسەپكە سايكەس، كومپانيا شىعىنى وتكەن جىلمەن سالىستىرعاندا ەكى ەسەدەن استامعا قىسقارعان: 2024 جىلى ول 33،2 ملرد تەڭگەنى قۇراعان.
سونىمەن قاتار، ساتىپ الۋشىلارمەن جاسالعان كەلىسىمشارتتار بويىنشا كومپانيانىڭ ءتۇسىمى 80%-عا ءوسىپ، 217،9 ملرد تەڭگەگە جەتتى. ءونىمنىڭ وزىندىك قۇنى دا 67%-عا ارتىپ، 159،8 ملرد تەڭگەنى قۇرادى.
كومپانيا ءتۇسىمىنىڭ نەگىزگى بولىگىن امموفوس – ازوت-فوسفور تىڭايتقىشىن ساتۋ اكەلەدى. ونى وتكىزۋدەن تۇسكەن تابىس 84%-عا ءوسىپ، 190 ملرد تەڭگەگە جەتتى. تاعى 24 ملرد تەڭگەنى ۇساقتالعان كەندى ساتۋ اكەلدى. وزىندىك قۇننىڭ وسۋىنە ەڭ كوپ اسەر ەتكەن – شيكىزات پەن ماتەريالدار قۇنىنىڭ 33%-عا (80 ملرد تەڭگەگە) ارتۋى، سونداي-اق جالاقى شىعىندارىنىڭ 77%-عا (17 ملرد تەڭگەگە) ءوسۋى.
كومپانيانىڭ وتكىزۋ جانە تاسىمالداۋ شىعىندارى ايتارلىقتاي – 40%-عا ءوسىپ، 23،9 ملرد تەڭگەگە جەتتى، ال جالپى اكىمشىلىك شىعىندار ازايىپ، 14،3 ملرد تەڭگەنى قۇرادى.
ناتيجەسىندە «كازفوسفاتتىڭ» وپەراسيالىق پايداسى 11،6 ملرد تەڭگە بولدى، الايدا ونى قارجىلاندىرۋ شىعىندارى – 14،6 ملرد تەڭگە، سونداي-اق باعامدىق ايىرمادان بولعان 5 ملرد تەڭگە كولەمىندەگى ەلەۋلى شىعىن «جەپ قويدى». ءبىر جىل بۇرىن كومپانيا باعامدىق ايىرمادان پايدا كورگەن ەدى.
سونىمەن قاتار، كومپانيانىڭ تابىس سالىعى بويىنشا شىعىندارى 6 ملرد تەڭگەنى قۇرادى. وتكەن جىلى وپەراسيالىق شىعىنعا بايلانىستى كومپانيا سالىقتان 5 ملرد تەڭگە ۇنەمدەگەن.
2025 جىلدىڭ سوڭىنا قاراي Halyk Bank، «قازاقمىس» جانە ءارتۇرلى بايلانىستى تاراپتار تاراپىنان كومپانياعا بەرىلگەن جالپى قارىز سوماسى 156 ملرد تەڭگەنى قۇرادى.
«كازفوسفات» فوسفوريت كەنىن وندىرەدى جانە وڭدەيدى، مينەرالدى تىڭايتقىشتار شىعارادى. كومپانيا جامبىل وبلىسىنداعى شولاقتاۋ، اقساي، كوكسۋ، كيستاس، جاڭاتاس كەن ورىندارىن يگەرۋدە. ول تارازداعى مينەرالدى تىڭايتقىشتار زاۋىتىنا جانە ستەپنوگورسكىدەگى حيميا زاۋىتىنا يەلىك ەتەدى.
«كازفوسفات» كومپانياسى مفسا-دا تىركەلگەن CAF Holding-كە تيەسىلى. ونىڭ يەلەرى، ءوز كەزەگىندە، KP Fertilizers Ltd. (مفسا) – 50%، Kazakhmys Resources B.V. – 40%، سونداي-اق ءماجىلىس ەكس-سپيكەرى نۇرلان نيگماتۋلليننىڭ ۇلدارى نۇرلان ۇلى نۇرحان – 5% جانە نۇرلان ۇلى نۇرجان – 5%.
گوللانديالىق Kazakhmys Resources B.V. كومپانياسى، شاماسى، بايلىعى $5،9 ملرد دەپ باعالاناتىن ميللياردەر ۆلاديمير كيممەن بايلانىستى. بۇرىن ول ونىڭ يەسى رەتىندە تىركەلگەن.
KP Fertilizers Ltd. «قازحيمپروم حولدينگكە» تيەسىلى. ونىڭ يەلەرى – «ءۋرالحيمنىڭ» بۇرىنعى توپ-مەنەدجەرلەرى، رەسەيلىكتەر ەۆگەني شاۆەل (ۇلەسى 33،34%)، ميحايل گەنكين (33،33%) جانە سەرگەي مومسەليدزە (33،33%).
بۇعان دەيىن ۆلاديمير كيمگە تيەسىلى Kazakhmys Copper كومپانياسى Bank RBK-گە كەپىلدىك رەتىندە وسى بانكتەگى شوتتارىندا $250 ملن ۇسىناتىنى حابارلانعان. كەپىلدىك ۆلاديمير كيم دە ورتاق يەسى بولىپ تابىلاتىن فوسفور كومپانيالارىنىڭ قارىزدارى بويىنشا ەنگىزىلەدى.