28 شىلدەدە قازاقستاننىڭ بەس قالاسىندا قولايسىز مەتەوجاعدايلار كۇتىلەدى، بۇل اتموسفەرادا زياندى زاتتاردىڭ جينالۋىنا اكەلەدى. اۋا ساپاسىنىڭ ناشارلاۋ ءقاۋپى الماتى، اقتوبە، بالقاش، سونداي-اق تۇنگى ۋاقىتتا استانا مەن قوستاناي قالالارىندا ءتونىپ تۇر، دەپ حابارلايدى infohub.kz سايتى.
سينوپتيكتەردىڭ مالىمەتىنشە، اتالعان ەلدى مەكەندەردە زياندى قوسپالاردىڭ جەرگە جاقىن اۋا قاباتىندا ۇستالۋىنا جاعداي تۋادى. قولايسىز مەتەوجاعدايلار (قمج) تىمىق اۋا رايى، ءالسىز جەل، تۇمان جانە تەمپەراتۋرالىق ينۆەرسيانىڭ سالدارىنان پايدا بولادى، بۇل ەكولوگيالىق احۋالدىڭ ناشارلاۋىنا سەبەپ بولادى.
مامانداردىڭ ەسكەرتۋىنشە، قمج كەزەڭىندە لاستانعان اۋانىڭ دەنساۋلىققا كەرى اسەر ەتۋ ءقاۋپى ارتادى، اسىرەسە تىنىس الۋ جانە جۇرەك-قان تامىرلارى جۇيەسىنىڭ سوزىلمالى اۋرۋلارى بار ادامدار ءۇشىن. لاستانۋ دەڭگەيىنە جەل جىلدامدىعى، ىلعالدىلىق، اۋا تەمپەراتۋراسى جانە جاۋىن-شاشىننىڭ بولۋى دا اسەر ەتەدى.
تۇرعىندارعا كوشەدە، اسىرەسە قاربالاس جولدار مەن شىعارىندى كوزدەرىنىڭ ماڭىندا بولۋ ۋاقىتىن قىسقارتۋ ۇسىنىلادى. بالالارعا، قارت ادامدارعا جانە جۇكتى ايەلدەرگە ۇزاق سەرۋەندەردەن باس تارتقان ءجون. تىنىس الۋ جانە جۇرەك اۋرۋلارى بار ادامدار مەن اللەرگيالىق اۋرۋلارعا شالدىققاندار قاجەتتى دارى-دارمەكتەرىن وزدەرىمەن الىپ ءجۇرۋى كەرەك. قمج كۇندەرى اشىق اۋادا قارقىندى دەنە جاتتىعۋلارىن شەكتەۋ جانە جاتتىعۋلاردى جابىق ءۇي-جايلارعا اۋىستىرعان ءجون.
بۇعان دەيىن كازگيدرومەتتىڭ بولجامى بويىنشا 28 شىلدەدە قازاقستاندا اۋا رايى قاراما-قايشى بولاتىنى حابارلانعان بولاتىن: كەيبىر وڭىرلەردى بۇرشاق ارالاس نوسەر مەن قاتتى جەل، ال باسقالارىن – ەكسترەمالدى ىستىق، مىسالى، ماڭعىستاۋ وبلىسىندا اۋا +47 گرادۋسقا دەيىن قىزادى.