جاڭاوزەندە كۇيىك بولىمشەسىن اشۋعا بولىنگەن دەمەۋشىلىك قاراجاتتى جىمقىرۋ سحەماسى اشكەرەلەندى. قازاقستان رەسپۋبليكاسىنىڭ قارجىلىق مونيتورينگ اگەنتتىگىنىڭ قىزمەتكەرلەرى انىقتاعانداي، مەديسينالىق جابدىققا اۋدارىلعان 223 ملن تەڭگەنىڭ تەك 92 ملن تەڭگەسى عانا ماقساتىنا جۇمسالعان، ال اۋرۋحانا كەشەندى جابدىقتاۋدىڭ ورنىنا ەكى كۇيىككە قارسى توسەك العان، دەپ حابارلايدى infohub.kz سايتى.

ءىس ماتەريالدارىنا سايكەس، 2025 جىلى ماڭعىستاۋ وبلىسىنىڭ دەنساۋلىق ساقتاۋ باسقارماسى «قازمۇنايگاز» ۇك اق-عا كۇيىك بولىمشەسىن اشۋعا دەمەۋشىلىك كومەك كورسەتۋ تۋرالى ءوتىنىش بىلدىرگەن. وسىدان كەيىن «وزەنمۇنايگاز» اق «جارىلقاۋ» قوعامدىق قورىنا 223 ملن تەڭگە اۋدارعان.

باستاپقىدا جوبا سەگىز ءتۇرلى مەديسينالىق جابدىقتى ساتىپ الۋدى جانە قىزمەتكەرلەردى وقىتۋدى كوزدەگەن. الايدا كەيىن شارتتار وزگەرتىلىپ، بولىمشەنى كەشەندى جابدىقتاۋدىڭ ورنىنا قوعامدىق قور، قالالىق اۋرۋحانا جانە «AKBS Invest» ج ش س اراسىندا تەك ەكى كۇيىككە قارسى توسەك ساتىپ الۋعا ءۇشجاقتى شارت جاسالعان.

«بۇل رەتتە ساتىپ الۋ وسىنداي قۇنى بار مەديسينالىق تەحنيكانى ءبىرىڭعاي ديستريبيۋتور ارقىلى الۋدى كوزدەيتىن زاڭناما تالاپتارىن اينالىپ ءوتىپ جۇرگىزىلگەن»، — دەپ ناقتىلادى قارجىلىق مونيتورينگ اگەنتتىگىندە.

تەرگەۋ دەرەكتەرى بويىنشا، زاڭسىز سحەماعا قالالىق اۋرۋحانا ديرەكتورىنىڭ ورىنباسارى، «جارىلقاۋ» قوعامدىق قورىنىڭ جەتەكشىسى، جەتكىزۋشى، سونداي-اق جاڭاوزەن اكىمىنىڭ بۇرىنعى ورىنباسارى قاتىسقان.

ناتيجەسىندە جابدىق ساتىپ الۋعا تەك 92 ملن تەڭگە جۇمسالعان. قالعان سوما ۇلەستەس كاسىپورىندار ارقىلى قولما-قول اقشاعا اينالدىرىلىپ، قاتىسۋشىلار اراسىندا بولىنگەن.

«AKBS Invest» ج ش س وكىلى قىلمىستىق جولمەن تاپقان كىرىسكە استانادان پاتەر ساتىپ الىپ، ونى ءۇشىنشى تۇلعالارعا راسىمدەگەن»، — دەپ قوستى قما-دا.

ءۇش كۇدىكتى قاماۋعا الىندى. جاڭاوزەن اكىمىنىڭ ەكس-ورىنباسارىنا قاتىستى لاۋازىمدىق وكىلەتتىگىن اسىرا پايدالانۋ فاكتىسى بويىنشا تەرگەۋ باستالدى. سحەماعا قاتىسۋشىلاردىڭ مۇلكىنە، ونىڭ ىشىندە 3 پاتەر، 2 تۇرعىن ءۇي جانە ءبىر اۆتوكولىككە تىيىم سالىندى.

تەرگەۋ جالعاسۋدا.

بۇعان دەيىن «كۋرسيۆ» قارجىلىق مونيتورينگ اگەنتتىگى مىندەتتى الەۋمەتتىك مەديسينالىق ساقتاندىرۋ سالاسىنداعى الاياقتىق فاكتىلەرى بويىنشا 36 قىلمىستىق ءىستى تەرگەپ جاتقانىن جازعان.