ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتورى جانسەيىت تۇيمەبايەۆ جاڭا وقۋ جىلىنىڭ باستالۋىنا وراي ستۋدەنتتەرمەن كەزدەستى، دەپ حابارلايدى infohub.kz سايتى.
كەزدەسۋدە مەملەكەت باسشىسى قاسىم-جومارت توقاەۆتىڭ جاساندى ينتەللەكتىنى دامىتۋ، سيفرلىق تەحنولوگيالاردى كەڭىنەن ەنگىزۋ جانە قازاقستاندى زاماناۋي سيفرلىق مەملەكەتكە اينالدىرۋ جونىندەگى تاپسىرمالارىنا سايكەس اتقارىلعان جۇمىستاردىڭ ناتيجەلەرى تانىستىرىلدى. رەكتور ۋنيۆەرسيتەتتىڭ الداعى جوسپارلارى تۋرالى دا ايتىپ، پرەزيدەنتتىڭ جولداۋىندا بەلگىلەنگەن، جاستاردى قولداۋعا جانە دامىتۋعا باعىتتالعان تاپسىرمالاردىڭ ىسكە اسىرىلۋى جونىندە اقپارات بەردى.
ءىس-شاراعا ءبىرىنشى كۋرس ستۋدەنتتەرى، «التىن بەلگى» بەلگىسىنىڭ يەگەرلەرى، حالىقارالىق وليمپيادالار مەن جارىستاردىڭ جەڭىمپازدارى، سونداي-اق وقۋ ورنىنىڭ قوعامدىق ومىرىنە بەلسەنە قاتىساتىن جاستار قاتىستى. بۇگىندە ءال-فارابي اتىنداعى قازاق ۇلتتىق ۋنيۆەرسيتەتىندە 30 مىڭعا جۋىق ستۋدەنت ءبىلىم الادى. جاڭا 2026-2027 وقۋ جىلىندا ۋنيۆەرسيتەت ستۋدەنتتەرىنىڭ قاتارىن 8117 ءبىرىنشى كۋرس ستۋدەنتى تولىقتىردى، ولاردىڭ ىشىندە 674 «التىن بەلگى» بەلگىسىنىڭ يەگەرى مەن رەسپۋبليكالىق جانە حالىقارالىق جارىستاردىڭ جەڭىمپازى بار.
جوعارى وقۋ ورنىنىڭ باسشىسى ستۋدەنتتەردى جاڭا وقۋ جىلىنىڭ باستالۋىمەن قۇتتىقتادى. جانسەيىت تۇيمەبايەۆ ءوز سوزىندە قازىرگى كەزەڭدە جوعارى ءبىلىم جۇيەسىنىڭ الدىندا جاڭا مىندەتتەر تۇرعانىن اتاپ ءوتتى.
«ءبىز ءۇشىن ەڭ باستى قۇندىلىق – ستۋدەنت. سوندىقتان سيفرلىق ترانسفورماسيا ەڭ الدىمەن جاستاردىڭ ساپالى ءبىلىم الۋىنا، عىلىمي ىزدەنىسىنە جانە كاسىبي دامۋىنا ىقپال ەتۋى ءتيىس. قازۇۋ ستۋدەنتتەرى ەلىمىزدىڭ سيفرلىق ەكونوميكاسىن قالىپتاستىراتىن مامانداردىڭ جاڭا بۋىنى بولۋى كەرەك»، – دەدى رەكتور.
كەزدەسۋ بارىسىندا جاستاردىڭ ازاماتتىق جاۋاپكەرشىلىگى مەن قوعامدىق مادەنيەتى ماسەلەلەرىنە ەرەكشە نازار اۋدارىلدى. رەكتور زاڭ مەن ءتارتىپتى ساقتاۋ، قوعامدىق ورتادا ەتيكالىق نورمالاردى ۇستانۋ، ۇلكەندى سىيلاۋ جانە كىشىگە قامقورلىق جاساۋ ءاربىر ستۋدەنتتىڭ كۇندەلىكتى ءومىرىنىڭ اجىراماس بولىگىنە اينالۋى كەرەكتىگىن اتاپ ءوتتى.
سونىمەن قاتار ۋنيۆەرسيتەت باسشىسى ستۋدەنتتەردى سالاۋاتتى ءومىر سالتىن ۇستانۋعا، دۇرىس تاماقتانۋعا، سپورتپەن تۇراقتى شۇعىلدانۋعا جانە زياندى ادەتتەردەن باس تارتۋعا شاقىردى. ۋنيۆەرسيتەت اۋماعىنىڭ تازالىعىن ساقتاۋ مەن جاسىل جەلەكتەرگە ۇقىپتى قاراۋ دا ءاربىر جاستىڭ ورتاق جاۋاپكەرشىلىگى ەكەنى ايتىلدى.
وقۋ مادەنيەتىن قالىپتاستىرۋعا جانە جاستاردىڭ زياتكەرلىك دەڭگەيىن ارتتىرۋعا ەرەكشە كوڭىل ءبولىندى. جانسەيىت تۇيمەبايەۆ مەملەكەت باسشىسى ۇسىنعان وتاندىق ادەبيەتتىڭ ۇزدىك تۋىندىلارىن وقۋدىڭ ماڭىزدىلىعىن اتاپ، ستۋدەنتتەردىڭ كىتاپ وقۋعا دەگەن قىزىعۋشىلىعىن ارتتىرۋ قاجەتتىگىن ايتتى.
كەزدەسۋ سوڭىندا جانسەيىت تۇيمەبايەۆ ستۋدەنتتەردىڭ جاڭا يدەيالارى مەن باستامالارى ۋنيۆەرسيتەتتىڭ دامۋىندا ماڭىزدى ءرول اتقاراتىنىن اتاپ ءوتىپ، جاستاردى عىلىمنىڭ، يننوۆاسيالاردىڭ جانە ەلىمىزدىڭ سيفرلىق ترانسفورماسياسىنىڭ دامۋىنا بەلسەنە ۇلەس قوسۋعا شاقىردى.