مەملەكەتتىك مۇناي قۇبىرى كومپانياسى «كازترانسويل» باسقارما مۇشەلەرىنىڭ 2025 جىلعى جيىنتىق سىياقىسى 405 ملن تەڭگەنى قۇراعانىن infohub.kz سايتى حابارلايدى.
قازاقستان قور بيرجاسىندا (KASE) جاريالانعان ەسەپتىلىككە سايكەس، كومپانيانىڭ اتقارۋشى ورگانىنا تولەنگەن جالپى سوما الدىڭعى جىلمەن سالىستىرعاندا تومەندەگەن — بۇل كورسەتكىش 484 ملن تەڭگە بولعان ەدى.
ەسەپتى كەزەڭنىڭ باسىم بولىگىندە باسقارما قۇرامىنا جەتى ادام كىردى. جىل بويى باس ديرەكتور ارمان قاسەنوۆ، ءامىرجان وسپانوۆ، جايدارمان يساقوۆ، عازيز قوشانوۆ جانە الماس ۇڭگىرسىنوۆ جۇمىس ىستەدى. قاڭتار ايىندا ولارعا اباي بەيسەمبايەۆ قوسىلدى، ال ساۋىردە كادرلىق وزگەرىستەر بولدى: ءوندىرىس جونىندەگى باس ديرەكتوردىڭ ورىنباسارى لاۋازىمىنا تەمىرحان ءابدىروۆتىڭ ورنىنا نۇرجان قۇشجانوۆ تاعايىندالدى.
سونىمەن قاتار، كومپانيا 2026 جىلدىڭ ءبىرىنشى جارتىجىلدىعىنداعى قارجىلىق كورسەتكىشتەرىن جاريا ەتتى. «كازترانسويل» كونسوليداسيالانعان تازا پايداسى وسى كەزەڭدە 29 ملرد تەڭگەنى قۇراپ، وتكەن جىلدىڭ سايكەس كەزەڭىمەن سالىستىرعاندا 33،4%-عا وسكەن. كىرىس 10،28%-عا ارتىپ، 180 ملرد تەڭگەنى قۇرادى.
«كازترانسويل» جالپى ۇزىندىعى 5،3 مىڭ شاقىرىمدى قۇرايتىن ماگيسترالدىق مۇناي قۇبىرلارى جەلىسىن جانە 2،3 مىڭ شاقىرىم سۋ قۇبىرلارىن پايدالانادى. كومپانيانىڭ باقىلاۋ پاكەتى (90% پليۋس ءبىر جاي اكسيا) «سامۇرىق-قازىنا» قورىنىڭ ەنشىلەس قۇرىلىمى «قازمۇنايگازعا» تيەسىلى، قالعان 10% مينوريتارلىق اكسيونەرلەردە.
بۇعان دەيىن «كازترانسويل» 2025 جىلعى پايداسىنان ديۆيدەندتەر تولەۋگە 45،39 ملرد تەڭگە جۇمسايتىنى حابارلانعان بولاتىن. سول جىلعى پايدا 56،6 ملرد تەڭگەنى قۇراعان.