«كەك قايتارۋشىلار: فينال» ءفيلمىنىڭ قايتا پروكاتى Marvel-دىڭ كۇتكەنىن اقتادى: تۋىندى «اۆاتاردى» باسىپ وزىپ، تاريحتاعى ەڭ كاسسالىق فيلم اتاندى. «فينالدىڭ» ءبىرىنشى ورىندى قالاي قايتارعانىن infohub.kz سايتى حابارلايدى.
جاڭا پروكاتتان كەيىن «كەك قايتارۋشىلار: فينالدىڭ» الەمدىك كاسساسى 2،925 ملرد دوللاردى قۇرادى، دەپ جازادى Variety. «اۆاتار» ەندى 2،923 ملرد دوللارمەن ەكىنشى ورىندا تۇر — بۇل سوما العاشقى پروكات پەن كەيىنگى بەس قايتا شىعارىلىمنىڭ ارقاسىندا جينالعان.
«كەك قايتارۋشىلار: فينال» العاش رەت 2019 جىلى ەڭ كاسسالىق فيلمدەر ءتىزىمىن باسقارعان ەدى. 2021 جىلى 2009 جىلعى «اۆاتار» «اۆاتار: سۋ جولى» ءفيلمىنىڭ شىعۋى قارساڭىنداعى قايتا پروكاتتان كەيىن ءبىرىنشى ورىندى قايتاردى. ەندى Marvel دجەيمس كەمەروننىڭ ءفيلمىن تاعى باسىپ وزدى. «كەك قايتارۋشىلار: فينالدىڭ» قايتا شىعارىلىمى الەم بويىنشا 126 ملن دوللاردان استام تابىس اكەلدى.
Disney مەن Marvel ءفيلمدى «كەك قايتارۋشىلار: قيامەت كۇنى» جارىققا شىعار الدىندا كينوتەاترلارعا قايتاردى، ونىڭ پرەمەراسى جەلتوقسانعا جوسپارلانعان. «فينال» Marvel-دىڭ العاشقى ۇلكەن سيۋجەتتىك جەلىسىنىڭ اياقتالۋى بولىپ، ون جىلدا شىققان 21 ءفيلمنىڭ كەيىپكەرلەرىن بىرىكتىردى.
«قيامەت كۇنى» جىلدىڭ ەڭ اۋقىمدى رەليزدەرىنىڭ ءبىرى بولادى دەپ كۇتىلۋدە. جاڭا فيلمگە «فينالدىڭ» رەجيسسەرلەرى ەنتوني مەن دجو رۋسسو قايتا ورالدى.
بۇعان دەيىن Kursiv LifeStyle «ورمەكشى-ادام: جاڭا كۇن» ءفيلمى تاريحتاعى ەڭ كاسسالىق فيلمدەر تىزىمىنە ەنگەنىن جازعان بولاتىن. جاڭارتىلعان رەكوردشىلار تىزىمىندە ول ءۇشىنشى ورىندا تۇر.